Президент Жолдауы: Жәйремнің болашағы нақты шешімдер мен нәтижелерге байланысты

Мен Қазақстан Республикасының Президенті Қасым-Жомарт Тоқаевтың Қазақстан халқына арнаған Жолдауымен мұқият таныстым. Бұл ел дамуының алдағы кезеңдегі стратегиялық бағдарын айқындайтын бағдарламалық құжат қана емес. Бұл – мемлекеттік органдардың, бизнестің және бүкіл қоғамның алдына нақты міндеттер қоятын, азаматтардың өмір сүру сапасын жақсартуға, экономикалық әлеуетті күшейтуге және әлеуметтік тұрақтылықты қамтамасыз етуге бағытталған іс-қимыл жоспары.

Жолдаудың басты ерекшелігі — оның өзегінде еңбек адамының мүддесі тұр. Экономиканы дамыту, өндірісті жаңғырту, заманауи технологияларды енгізу, инфрақұрылымды жетілдіру және әлеуметтік қолдауды күшейту мәселелері жеке қарастырылмайды. Олардың барлығы қазақстандықтардың әл-ауқатын арттыру міндетімен тығыз байланысты. Сондықтан, Президент айқындаған басымдықтар кәсіподақтар үшін де өзекті. Өйткені, біздің басты міндетіміз еңбеккерлердің құқықтары мен әлеуметтік мүдделерін қорғау.

Жолдауда көтерілген маңызды мәселелердің бірі — ең төменгі жалақыны кезең-кезеңімен арттыру. Бұл шешім, әсіресе, табысы төмен азаматтар үшін ерекше маңызды. Дегенмен, жалақының өсуі халықтың сатып алу қабілетін сақтаумен, инфляцияны тежеумен және тұрақты экономикалық өсім үшін қолайлы жағдай жасаумен қатар жүруі тиіс. Мұндай міндеттер Үкіметтің, жұмыс берушілердің және қызметкерлер өкілдерінің бірлескен іс-қимылын талап етеді. Ал кәсіподақ үшін бұл әділ еңбекақы төлеу, әлеуметтік кепілдіктерді сақтау және ұжымдық шартта көзделген міндеттемелердің орындалуымен тікелей байланысты.

Жолдауда өнеркәсіпті дамытуға, геологиялық барлау жұмыстарын кеңейтуге және шикізатты терең өңдеуге айрықша мән берілген. Бұл бағыттардың Жәйрем кенті үшін маңызы ерекше. Мемлекеттің аталған саладағы саясаты минералдық-шикізат базасын нығайтуға, инвестиция тартуға және отандық өндірістің бәсекеге қабілеттілігін арттыруға бағытталған. Түптеп келгенде, бұл экономикалық көрсеткіштер ғана емес, жаңа жұмыс орындары, тұрақты жұмыспен қамту және өндірістік кенттердің болашағы туралы мәселе.

Компанияның құрамындағы «Жәйрем кен байыту комбинаты» акционерлік қоғамы өңірдегі ірі өнеркәсіп кәсіпорындарының бірі ретінде тау-кен металлургия саласын дамытуға бағытталған міндеттердің жүзеге асуына елеулі үлес қосып келеді. Өндірісті жаңғырту, заманауи технологияларды енгізу және өнеркәсіптік қауіпсіздікті арттыру жөніндегі жұмыстар Мемлекет басшысы белгілеген басымдықтармен үндеседі. Соның нақты көрінісі ретінде Жәйремде іске қосылған жаңа полиметалл байыту фабрикасын атауға болады. Бұл жоба өндіріс тиімділігін арттыруға ғана емес, өңірдің өндірістік әлеуетін нығайтуға да мүмкіндік берді.

Президент Жолдауында цифрлық трансформация мен жасанды интеллект технологияларын дамытуға ерекше назар аударылды. Бүгінде цифрлық шешімдер өндірістің ажырамас бөлігіне айналып келеді. Олар құрал-жабдықтардың техникалық жай-күйін бақылауға, ақаулардың алдын алуға, өндірістік процестердің тиімділігін арттыруға және қауіп-қатерлерді азайтуға мүмкіндік береді. Алайда, технологиялық жаңғыру кадрлық әлеуетті дамытумен қатар жүруі қажет. Сондықтан, техникалық білім беруді жетілдіру, дуальды оқыту жүйесін кеңейту, қызметкерлердің біліктілігін арттыру және тәлімгерлік институтын дамыту бұрынғыдан да өзекті бола түсті.

Мемлекет басшысы энергетикалық тұрақтылық пен инфрақұрылымды дамыту мәселелеріне де айрықша тоқталды. Өнеркәсіптік өңірлер үшін бұл аса маңызды бағыттардың бірі. Өйткені, энергиямен тұрақты қамтамасыз ету, сенімді көлік қатынасы және сапалы инженерлік желілер кәсіпорындардың тиімді жұмысына ғана емес, тұрғындардың күнделікті тұрмыс сапасына да тікелей әсер етеді.

Экологиялық қауіпсіздік мәселесі де күн тәртібінен түскен жоқ. Қоршаған ортаны қорғау мемлекетке ғана емес, бизнес пен қоғамға ортақ міндет. Жәйрем үшін өндірістік қалдықтармен қауіпсіз жұмыс істеу, шаңдану деңгейін төмендету, табиғи ресурстарды ұтымды пайдалану және экологиялық технологияларды енгізу ерекше маңызды. Қазіргі заманғы өндіріс қоршаған орта мен адам денсаулығына жауапкершілікпен қарау қағидатынан ажырамауы тиіс.

Өңірдің тұрақты дамуы үшін кәсіпкерлікті қолдау да маңызды рөл атқарады. Президент шағын және орта бизнестің экономикадағы үлесін арттыру міндетін қойды. Бұл Жәйрем үшін де жаңа мүмкіндіктерге жол ашады. Жергілікті кәсіпкерліктің дамуы жаңа жұмыс орындарын құруға, қызмет көрсету сапасын жақсартуға және өндірістік кооперацияны кеңейтуге ықпал етеді.

Алайда, қандай технология енгізілсе де, қандай өндірістік көрсеткішке қол жеткізілсе де, басты құндылық — адам. Сондықтан, еңбек қауіпсіздігі, өндірістік жарақаттанудың алдын алу, қызметкерлерді сапалы жеке қорғаныс құралдарымен қамтамасыз ету мәселелері жұмыс берушілер мен кәсіподақтардың тұрақты назарында болуы тиіс. Қауіпсіз еңбек жағдайын жасау — заң талаптарын орындау ғана емес, кез келген кәсіпорынның әлеуметтік жауапкершілігінің өлшемі.

Жолдауда өңірлік инфрақұрылымды дамытуға да ерекше мән берілген. Бүгінде мемлекет коммуналдық желілерді жаңғырту, жол инфрақұрылымын жақсарту және әлеуметтік нысандарды дамыту бойынша ауқымды бағдарламаларды жүзеге асыруда. Соған қарамастан, Жәйрем үшін инженерлік коммуникацияларды жаңарту, коммуналдық қызметтердің сапасын арттыру, жолдарды жөндеу және қоғамдық кеңістіктерді абаттандыру мәселелері өзекті күйінде қалып отыр. Бұл міндеттерді шешу Үкіметтің, жергілікті атқарушы органдардың, бизнестің және қоғамдық институттардың үйлесімді жұмысына байланысты. Тек осындай өзара ықпалдастық нақты нәтижеге жеткізеді.

Президенттің ерекше қажеттілігі бар балаларды қолдау және оңалту жүйесін дамыту жөніндегі бастамалары да үлкен үміт ұялатады. Көптеген отбасы үшін бұл жай ғана әлеуметтік мәселе емес, күнделікті өмір сапасына тікелей әсер ететін маңызды қажеттілік.

Бұған дейін Ұлытау облысы басшылығымен өткен кездесулердің бірінде Жәйремде ерекше қажеттілігі бар балаларға арналған оңалту орталығын ашу мәселесі көтерілген болатын. Бұл бастама қолдау тауып, ғимарат бөлу және жобаны қаржыландыру мүмкіндіктері талқыланған еді. Өкінішке қарай, түрлі объективті себептерге байланысты мәселе іс жүзінде жүзеге аспай қалды.

Соған қарамастан, мұндай қызмет түрлеріне деген сұраныс әлі де жоғары. Бүгінде көптеген ата-аналар балаларын оңалту үшін басқа қалаларға қатынауға мәжбүр. Бұл қосымша қаржылық және ұйымдастырушылық қиындықтар туындатады. Сондықтан, өңірлік әлеуметтік инфрақұрылымды дамыту бағдарламалары аясында Жәйремде тұрақты жұмыс істейтін оңалту қызметін немесе мамандандырылған бөлімше ашу мүмкіндігін қарастыру маңызды деп есептеймін. Мұндай жоба ерекше қажеттілігі бар балаларды тәрбиелеп отырған отбасыларға нақты қолдау көрсетіп, Президент Жолдауында белгіленген әлеуметтік міндеттердің орындалуына үлес қосар еді.

«Казцинк» компаниясында қызметкерлерді әлеуметтік қолдау мәселесіне әрдайым ерекше көңіл бөлініп келеді. Көпбалалы отбасыларға, жалғызбасты ата-аналарға және ерекше қажеттілігі бар балаларды тәрбиелеп отырған отбасыларға қолдау көрсету компанияның әлеуметтік саясатының маңызды бөлігі болып табылады. Алдағы уақытта бұл жұмысты мемлекеттік бастамалармен сабақтастыра отырып жалғастырудың маңызы зор. Кәсіподақтың міндеті – еңбеккерлердің мұң-мұқтажын жұмыс берушіге жеткізу, әлеуметтік қолдау тетіктерін жетілдіруге ықпал ету және адамдардың өмір сапасын жақсартуға бағытталған ұсыныстарды ілгерілету.

Жәйрем еңбеккерлері күн сайын ел экономикасының дамуына лайықты үлес қосып келеді. Сондықтан, мемлекеттік саясаттың нәтижесі тек ресми статистикада ғана емес, қарапайым адамдардың өмірінде де көрініс табуы тиіс. Ол қауіпсіз еңбек жағдайынан, лайықты жалақыдан, заманауи өндірістен, дамыған инфрақұрылымнан және отбасылардың ертеңгі күнге деген сенімінен байқалуы керек.

Президент Жолдауының басты мәні де осында. Нақты шешімдер қабылдап, жүйелі жұмыс жүргізу және оның нәтижесін халықтың сезінуі. Жәйремнің де, еліміздің де болашағы осыған байланысты.

Гауһар НАУРЫЗБАЕВА, «Жәйрем КБК» АҚ бастауыш

кәсіподақ ұйымы төрағасының орынбасары.