Запастағы офицерлер: сүйікті кәсіпорнына қайта оралған жас мамандар

Білім алу, маман ретінде қалыптасу және ел алдындағы азаматтық борышты өтеу — әрбір жас үшін маңызды өмірлік белестер. Ал осы жолдан абыроймен өтіп, кейін туған жеріне қайта оралып, өзі таңдаған кәсіпке адал болып қалу ерекше құрметке лайық қасиет.

Бүгінде «Жәйрем кен байыту комбинаты» АҚ-да еңбек етіп жүрген бір топ жас маман дәл осындай таңдаудың үлгісін көрсетіп отыр. Олар жоғары оқу орындарын тәмамдап, әскери кафедрада даярлықтан өтіп, лейтенант шенін алды. Өндірістегі еңбек жолын бастап үлгерген кезде запастағы офицер ретінде әскери қызметке шақырылып, мемлекет алдындағы міндетін мінсіз орындады. Қазір олардың барлығы қайтадан өз кәсіпорындарына оралып, өндірістің дамуына үлес қосып келеді.

Қазақстан Республикасының Конституциясына сәйкес Отанды қорғау – әр азаматтың қасиетті парызы әрі міндеті. Ал әскери кафедраны тәмамдап, запастағы офицер атанған жастар қажет болған жағдайда ел қауіпсіздігін қамтамасыз ету ісіне үлес қосуға қашанда дайын болуы тиіс. Жәйремдік жас мамандар бұл жауапкершілікті жоғары деңгейде атқарып шықты.

Танк әскерінде шыңдалған тау-кен маманы

Әлішер Бүркітбаев 2018 жылы Қарағанды мемлекеттік техникалық университетін «Тау-кен ісі» мамандығы бойынша тәмамдады. Студенттік жылдары әскери кафедрада білім алып, лейтенант шенін иеленді.

Еңбек жолын «Жәйрем кен байыту комбинаты» АҚ құрамындағы Жәйрем кенішінде бастап, кәсіби біліктілігі мен ұйымдастырушылық қабілетінің арқасында учаске бастығы қызметіне дейін өсті.

Кейін әскери қызметке шақырылып, Үшарал қаласындағы танк әскерлері құрамында борышын өтеді. Әскери орта оған тәртіптің, жауапкершіліктің және батыл шешім қабылдай білудің қаншалықты маңызды екенін терең ұқтырды.

Қызмет мерзімін аяқтағаннан кейін Әлішер көп ойланбастан өзі еңбек жолын бастаған кәсіпорынға қайта оралды. Өйткені, ол үшін Жәйрем тек туған жер ғана емес, кәсіби қалыптасу мектебі.

Елге қызметтің қос мектебінен өткен маман

Ернұр Жақсытай Әбілқас Сағынов атындағы Қарағанды техникалық университетінде «Тау-кен кәсіпорындарының және жер асты ғимараттарының құрылысы» мамандығы бойынша білім алып, әскери кафедраны аяқтаған соң лейтенант шеніне ие болды.

Әскери борышын Абай облысы Аягөз қаласындағы Қабанбай батыр атындағы 11-танк бригадасының 10810 әскери бөлімінде өтеді.

Әскерден кейін Ернұрдың алдында түрлі мүмкіндіктер болғанымен, ол туған өлкесіне оралып, еңбек жолын жалғастыруды таңдады. Қазір «Жәйрем кен байыту комбинаты» АҚ-ның жылумен және сумен жабдықтау цехында еңбек етеді.

Оның пікірінше, әскери қызмет адамды тәртіпке, төзімділікке және жауапкершілікке баулыса, өндіріс сол қасиеттерді нақты нәтижеге айналдыруға мүмкіндік береді.

Әскери тәжірибе мен инженерлік білім үндестігі

Қарағанды мемлекеттік техникалық университетінің «Тау-кен ісі» мамандығы бойынша түлегі Ерасыл Жанысов та әскери кафедрада оқып, лейтенант атағын алған.

Ол әскери қызметін Өскемен гарнизонының 27943 әскери бөлімінде жөндеу жұмыстары ротасының командирі ретінде атқарды. Осы кезеңде басқарушылық тәжірибе жинақтап, ұйымдастырушылық қабілетін шыңдады.

Әскерге дейін маркшейдер болып жұмыс істеген Ерасыл бүгінде комбинатта геотехник қызметін атқарып жүр. Оның айтуынша, әскери ортада қалыптасқан жинақылық пен жауапкершілік өндірістегі маңызды міндеттерді орындауда үлкен көмек береді.

Өз кәсібіне қайта оралған жас геолог

Болат Әбдіманат Қарағанды мемлекеттік техникалық университетінде «Геология және пайдалы қазбалар кен орындарын барлау» мамандығы бойынша білім алып, әскери кафедраны тәмамдағаннан кейін лейтенант шеніне ие болды.

Әскери борышын Аягөз қаласындағы 10810 әскери бөлімде атқарып келген соң қайтадан өз ұжымына оралды.

Қазір Болат полиметалл байыту фабрикасында шебер қызметін атқарады. Оның айтуынша, пайдалы қазбаларды игеру, өндірісті дамыту және ел экономикасына үлес қосу да Отанға қызмет етудің маңызды көрінісі.

Неліктен олар қайта оралды?

Бұл жастардың тарихын ерекше ететін бір жайт бар. Олар мектептен кейін бірден әскер қатарына алынған мерзімді әскери қызметшілер емес. Олар жоғары білім алып, әскери кафедраны аяқтап, лейтенант шенін иеленгеннен кейін «Жәйрем кен байыту комбинаты» АҚ-да еңбек етіп жүрген кезде запастағы офицер ретінде әскери қызметке шақырылды.

Яғни, олардың кәсіби жолы әлдеқашан басталып қойған еді. Әскери қызмет аяқталған соң олар тек өндіріске қайта оралып қана қойған жоқ, өз таңдауларын қайтадан саналы түрде жасады.

Бүгінде әскери қызмет өткерген азаматтарға мемлекет тарапынан түрлі әлеуметтік қолдау шаралары қарастырылған. Тұрғын үй бағдарламалары, білім алу мүмкіндіктері, мемлекеттік қызмет пен күштік құрылымдардағы мансаптық перспективалар — мұның бәрі әскери қызметін өтеген мамандар үшін ашық бағыттар.

Алайда, Әлішер, Ернұр, Ерасыл және Болат басқа жолды таңдады. Олар үлкен қалалардағы мүмкіндіктердің соңынан кетпеді, әскери мансапты жалғастыруға да ұмтылмады. Керісінше, өздерінің еңбек жолы басталған кәсіпорынға қайта келді.

Бұл таңдау көп нәрсені аңғартады. Өйткені, жас маман қай ортада өзін бағалайтынын, қай жерде кәсіби тұрғыдан өсе алатынын жақсы түсінеді. Сондықтан, олардың қайта оралуы «Жәйрем кен байыту комбинатының» «Қазцинк» жүйесіндегі беделі мен тартымдылығының нақты көрінісі деуге толық негіз бар.

Комбинат олардың әрқайсысына алғашқы өндірістік тәжірибе берді, тәжірибелі мамандардан үйренуге мүмкіндік жасады, кәсіби тұрғыдан қалыптасуына ықпал етті. Сондықтан, жастар үшін бұл жай ғана жұмыс орны емес, болашаққа жол ашқан сенімді ортаға айналды.

Мұнда еңбекті бағалайтын корпоративтік мәдениет қалыптасқан, кәсіби өсуге мүмкіндік бар, жас қызметкерлердің бастамалары қолдау табады. Сондықтан, әскери қызметтен кейін дәл осы ұжымға оралу олардың кәсіпорынға деген сенімін және таңдаған кәсібіне деген адалдығын көрсетеді.

Еңбекке адалдық – нағыз патриотизмнің көрінісі

Патриотизм тек әскери киім киіп, сапта тұрумен өлшенбейді. Ол туған елдің дамуына күнделікті еңбегімен үлес қоса білуден де көрінеді.

Әлішер Бүркітбаев, Ернұр Жақсытай, Ерасыл Жанысов және Болат Әбдіманат жоғары білім алды, әскери кафедрада даярлықтан өтіп, лейтенант шенін иеленді, запастағы офицер ретінде әскери міндетін адал атқарды. Ал бүгінде өз мамандықтары бойынша еңбек етіп, өндірістің дамуына үлес қосып жүр.

Олардың өмір жолы жас буынға маңызды үлгі көрсетеді. Бір кезеңде олар әскери антқа адал қызмет етсе, бүгінде кәсіби еңбегі арқылы өнеркәсіптің дамуына атсалысуда. Бұл азаматтық жауапкершілік пен еңбекке деген құрметтің үйлескен көрінісі.

Ең бастысы, олар өз болашағын дәл осы кәсіпорынмен байланыстырады. Сүйікті компаниясына қайта оралған жас офицерлердің таңдауы туған жерге деген сүйіспеншіліктің, өз ісіне деген адалдықтың және «Қазцинк» мектебінен өткен мамандардың кәсіби ұстанымының жарқын дәлелі болып табылады.

Осындай білімді, мақсатшыл және жауапты жастар барда «Жәйрем кен байыту комбинаты» АҚ-да, Жәйрем өңірінің де болашағы жарқын болары сөзсіз. Олар әскери қызметтен оралғаннан кейін басқа мүмкіндіктерді емес, өздері жақсы көретін кәсіпті, өздері сенетін ұжымды және өздері қалыптасқан кәсіпорынды таңдады. Ал бұл кез келген компанияның шынайы беделі мен құндылығының ең маңызды көрсеткіштерінің бірі.

Гауһар НАУРЫЗБАЕВА.