Қоғамның тұрақты дамуы мен әрбір азаматтың қауіпсіз өмір сүруінің басты кепілі – заң мен тәртіптің сақталуы. Заң үстемдік құрған мемлекетте әділдік орнап, азаматтардың құқықтары мен бостандықтары қорғалады.
Сондықтан, құқықтық мәдениетті қалыптастыру және құқық бұзушылықтың алдын алу – бүгінгі күннің маңызды міндеттерінің бірі.
Жас ұрпақтың бойына заңға құрметпен қарау қасиетін сіңіру отбасынан басталып, білім беру ұйымдарында жалғасады. Мектеп қабырғасында оқушыларға құқықтық тәрбие беру, олардың жауапкершілік сезімін арттыру және заң талаптарын түсіндіру бағытында жүйелі жұмыстар жүргізілуде.
Өйткені, құқық бұзушылықтың алдын алу – тек құқық қорғау органдарының ғана емес, бүкіл қоғамның ортақ ісі.
Қазіргі таңда жасөспірімдер арасында интернет қауіпсіздігі, буллинг пен кибербуллингтің алдын алу, қоғамдық орындардағы тәртіп ережелерін сақтау мәселелеріне ерекше назар аударылуда.
Оқушыларға өз құқықтарымен қатар міндеттерін де білу маңызды. Құқық пен міндеттің арақатынасын түсінген жас азамат қоғам алдындағы жауапкершілігін сезінеді және заң талаптарын сақтауға ұмтылады.
Құқық бұзушылықтың алдын алуда ата-аналардың рөлі ерекше. Баланың бос уақытын тиімді ұйымдастыру, оның ортасына көңіл бөлу, мектеппен тығыз байланыс орнату көптеген келеңсіз жағдайлардың алдын алуға мүмкіндік береді.
Сонымен қатар, білім беру ұйымдары, ата-аналар және құқық қорғау органдары арасындағы өзара ынтымақтастық оң нәтижелерге қол жеткізудің маңызды тетігі болып табылады.
Заң мен тәртіп – қоғамның қауіпсіздігі мен тұрақтылығының берік негізі. Әр азамат заң талаптарын сақтап, қоғамдық тәртіпті құрметтеген жағдайда ғана қауіпсіз әрі өркениетті қоғам қалыптасады.
Сондықтан, құқықтық сауаттылықты арттыру, заңға бағыну мәдениетін дамыту және құқық бұзушылықтың алдын алу бағытындағы жұмыстар әрдайым басты назарда болуы тиіс.
Қорытындылай келе, заңды құрметтеу – өзіңді, отбасыңды және болашағыңды құрметтеу деген сөз. Заң мен тәртіп үстемдік құрған қоғамда ғана бейбіт өмір, тұрақтылық және жарқын келешек болады.
Жұпар АЙТКУЛОВА,
қалалық білім бөлімінің құқық бұзушылықтың алдын алу жөніндегі әдіскері.