Достияров Жасұлан ата-аналардың алименттік міндеттемелері және оны орындамаудың құқықтық салдары туралы баяндама жасады

Бүгін Ұлытау облысының өңірлік коммуникациялар қызметінде брифинг өтті. Шарада Ұлытау облысының кәмелетке толмағандардың істері жөніндегі мамандандырылған ауданаралық сотының төрағасы Достияров Жасұлан Бейсенбекович ата-аналардың алименттік міндеттемелері және оны орындамаудың құқықтық салдары туралы баяндама жасады.

Спикердің айтуынша, Қазақстан Республикасының Конституциясы мен «Неке (ерлі-зайыптылық) және отбасы туралы» Кодексі ата-аналардың кәмелетке толмаған балаларын күтіп-бағуға міндетті екенін айқындайды. Егер алимент төлеу туралы келісім болмаса, сот шешімімен ата-ананың табысынан белгілі бір үлес мөлшерінде алимент өндіріліп алынады.

2024 жылғы сот тәжірибесі бойынша:

• Алимент өндіріп алу туралы 1 195 іс бойынша сот бұйрығы шығарылған.

• Әке болуды анықтау және алимент өндіріп алу туралы 71 іс қаралған.

• Неке бұзу істерімен бірге алимент тағайындау бойынша 105 іс қаралған.

• Қылмыстық кодекстің 139-бабы бойынша 12 қылмыстық іс қаралып, оның ішінде 2 тұлға бас бостандығынан айырылған.

• Ата-аналық құқықтарынан айыру туралы 45 азаматтық іс қаралып, 23 ата-ана ата-ана құқығынан айырылған.

Алименттік міндеттемелерді орындамаудың салдары:

1. Әкімшілік жауапкершілік:

• ӘҚБтК-нің 669-бабы бойынша 5 АЕК көлемінде айыппұл немесе 5 тәулікке әкімшілік қамақ қарастырылған.

2. Қылмыстық жауапкершілік:

• ҚК-нің 139-бабына сәйкес, алиментті 3 айдан астам төлемегендер 600 сағатқа дейін қоғамдық жұмысқа тартылуы, 2 жылға бас бостандығын шектеуі немесе бас бостандығынан айырылуы мүмкін.

3. Ата-аналық құқықтан айыру:

• Кодекстің 75-бабына сәйкес, алимент төлеуден қасақана жалтарған ата-ана сот шешімімен ата-ана құқығынан айырылуы мүмкін.

Спикер қоғамдық сананы арттыру, ата-аналарды жауапкершілікке тарту және балалардың құқығын қорғау бағытында атқарылып жатқан шараларды атап өтті. Сондай-ақ, халықты алименттік міндеттемелерді орындауға шақырып, борышкерлерге заңды талаптарды орындаудың маңыздылығын ескертті.

Ұлытау облысының Өңірлік коммуникациялар қызметі