2026 жылғы 18–19 шілде күндері Астана қаласында Қазақстанның креативті индустрияларын дамытуға және Ұлы Даланың тарихи-мәдени мұрасын насихаттауға арналған Creative Aimaq көрмесі ұйымдастырылады.
Creative Aimaq көрмесі қазақ халқының бай мәдени мұрасының бүгінгі заманғы дизайнда, сән индустриясында, зергерлік өнерде, кескіндемеде және авторлық қолөнерде жаңа сипат алып, шығармашылыққа шабыт беретінін айқын көрсетеді.
Көрме аясында Қазақстан тарихы мен Алтын Орда мәдениетінен шабыт алған заманауи сувенирлік өнімдер, ағаштан, былғарыдан, керамика мен киізден жасалған қолөнер бұйымдары, зергерлік әшекейлер, суретшілердің туындылары, этно-сән топтамалары және қазақтың дәстүрлі құрақ көрпе өнеріне арналған арнайы экспозиция ұсынылады.
Келушілер үшін былғары өңдеу, ағаш ою, ұлттық музыкалық аспаптар жасау, ұсталық өнер сияқты дәстүрлі кәсіптердің қыр-сырын таныстыратын шеберлік сабақтары өткізіледі. Сонымен қатар қолөнершілермен, суретшілермен және дизайнерлермен шығармашылық кездесулер ұйымдастырылып, ұлттық өнердің бүгінгі даму бағыттары кеңінен таныстырылады.
Көрменің концерт залында қазақстандық дизайнерлердің Ethno Fashion Show сән көрсетілімі өтіп, кешкі бағдарлама Jezz Acoustic Band тобының концертімен жалғасады.
Жоба отандық қолөнершілерді, дизайнерлерді, суретшілерді және шығармашылық кәсіпкерлерді қолдауға, сондай-ақ Made in Kazakhstan ұлттық брендін дамытуға бағытталған.
Creative Aimaq – тарихи мұра мен заманауи креативті индустрияларды тоғыстыратын, ұлттық құндылықтарды дәріптеп, Қазақстанның шығармашылық әлеуетін халықаралық деңгейде танытуға ықпал ететін маңызды мәдени алаң.
18-19 шілде, өтетін орны Астана қаласы, Хошы хан көшесі 16/2 Qazaq Creative Hub.