Ұлттық киім – ұлт бейнесі. Әрбір ұлттың өзіне тән мәдениеті мен қоғамдық өмірінен сыр шертетін ұлттық киімі болады. Ата-бабаларымыз ұлттық киімдерімізді зор талғаммен, сәнді әрі үйлесімді етіп күнделікті өмірде де киіп жүрген. Жылдан жылға мемлекет ғасырлар бойы ұрпақтан-ұрпаққа беріліп келе жатқан қазақ стиліндегі киіміміз бен дәстүріміздің нышанын насихаттап келеді.
Наурызнама бойынша 18 наурыз – «Ұлттық киім» күні болып аталып өтілуде. Бұл күні қазақтың ұлттық киімдерін дәріптеуге ұсынылған. Осыған орай, қаламыздың орталық кітапханасында «Ұлттық киім – ұрпаққа мұра» атты қаланың тігін шеберлерімен кездесу кеші ұйымдастырылды.
Аталмыш іс-шараға қолөнер бұйымдарынан көрме қойылды. Оқырмандарға ұлттық киімнің маңыздылығын түсіндіру, ұлттық киім тарихымен таныстыру, ұлттық киімді жастар арасында насихаттау, ұлттық киім тігумен айналысатын тігіншілерімен таныстыру, туындыларын дәріптеу мақсатында өткізілген кездесуде қаламыздың қолы алтын тігін шеберлері Әсел Махышева, Разия Құрманқұлова және Бақытгүл Төлеухановамен өте қызықты да әсерлі әңгіме болды. Тігіншілер өздерінің алып келген ұлттық киімдерін таныстырды. Шеберлерге келген қонақтар мен № 1 ЖББМ 9 сынып оқушылары өз сұрақтарын қойды.
Іс-шара соңында кітапхананың директоры Тлеухор Жанжұманқызы тігінші шеберлерімізге берекелі табыс тілеп, ақ тілегін жеткізді. Кітапханамыздағы «Алтын оймақ» үйірмесіне қатысуға шақырды. Ұлттық киімнің өзі – ұлт мәдениетінің жарқын көрінісі. Сондықтан, ұлттық киімдерді мерекеде ғана емес, күнделікті киіп жүрсе нұр үстіне нұр болар еді. Ұлт мәдениеті – халық өмірінің айнасы, оның болмысы. Еліміздің рухани дамуы ұлттық рухқа тікелей байланысты. Болашақ ұрпақ ұлттық киімнің қадір-қасиетін біліп, заман талабына сәйкес лайықтап киіп жүрсе, ата-дәстүрі жалғасын тауып, сәнге айналып, күнделікті өмірімізге енсе деген үміттеміз. Қазіргі таңда күнделікті кимесек те, өз маңызын сақтап отырған ұлттық киімдерімізді құрметтеу керек деп білеміз. Ең болмаса сырға, алқа секілді бір элементті насихаттай алсақ, бұл да ұлтқа деген құрмет. Ұлттық киімді ұлықтайық!
Мадина Айтбекова,
«Қаражал қаласының
орталықтандырылған
кітапханалар жүйесі» КММ
оқырмандарға қызмет көрсету
бөлімінің меңгерушісі.