Адамдықтың асыл айнасы

Қыстың қытымыр мінезін артқа тастап, жер бусанып, тіршілік атаулыға жан бітетін шұғылалы көктем де келіп жетті. Табиғатпен бірге адам көңілі де жаңарып, үміт пен сенімге толатын осы бір кезең – халқымыз үшін қашанда ерекше. Көктемнің алғашқы шуақты күндерімен қатар келетін Алғыс айту күні – рухани құндылықтарымызды жаңғыртып, татулық пен тағылымды дәріптейтін мереке.

Бұл күн – жай ғана күнтізбедегі дата емес, бұл – жүректегі жылылықтың, адамдық парыздың, бауырмалдық пен жанашырлықтың көрінісі. Тарихтың талай сынағынан өткен халқымыз үшін бір үзім нанды бөлісіп жеу, қиындықта қол ұшын беру, жақсылыққа жақсылықпен жауап қайтару – қанымызға сіңген қасиет. Сондықтан да алғыс айту – біз үшін жат ұғым емес, ұлттық болмысымыздың ажырамас бөлігі.

Алғыс айту күні – ең алдымен, ел ішіндегі бірлік пен келісімнің мерекесі. Бұл – тағдыр тоғыстырған түрлі ұлт пен ұлыстың бір шаңырақ астында тату-тәтті өмір сүріп жатқанын айшықтайтын күн. Бүгін біз ата-бабамыздың кең пейілі мен дарқан көңілінің арқасында қалыптасқан ынтымақтың қадірін тағы бір мәрте сезінеміз.

Осы күні әрбір жан жүрегіндегі ризашылық сөзін ата-анасына, ұстазына, әріптесіне, досына, көршісіне айтуға асығады. Себебі, қарапайым ғана «рақмет» сөзі кейде үлкен қуанышқа, жаңа үмітке жол ашады. Алғыс айту – адамдар арасындағы сенімді нығайтып, мейірімділікке бастайтын көпір.

Бүгінгі бейбіт өміріміз, еңбектің берекесі, ел ішіндегі татулық – баршамыздың ортақ жетістігіміз. Сондықтан да әрбір еңбек адамына, қоғамның тыныс-тіршілігіне үлес қосып жүрген жандарға алғыс айту – азаматтық парыз.

Шұғылалы көктеммен бірге келген бұл мереке әр шаңыраққа жылулық пен жақсылық әкелсін. Жүректерге мейірім ұялап, ризашылықтың шуағы арта берсін. Алғыс айту – тек бір күндік емес, күнделікті өміріміздің дағдысына айналса, қоғамымыз да мейірімді, бірлігіміз бекем болары сөзсіз.

Алғыс – адамдықтың асыл айнасы. Сол айнадан әрқайсымыз өз жүрегіміздің жылуын көре білейік.

Аманкелді АҚШАЛ.