Жәйрем кентінің бір маңызды бөлігі – Ескі Жәйремде қала әкімі Айқын Елеусізов халықпен кездесу өткізді. Кездесуге Жәйрем кентінің әкімі Қайрат Жансағымов, Қаражал қаласы әкімінің орынбасары Аманғазы Наукенов, Қаражал қалалық мәслихатының депутаты Марлан Шамбулов, жергілікті мекеме басшылары, кенттегі биыл атқарылатын жұмыстарға жауапты мердігерлер және Ескі Жәйрем тұрғындары қатысты.
Кездесу барысында Ескі Жәйремге газ тарту, көшелерге асфальт төсеу, үрмелі жабық спорт кешенін салу, ықшам аудан ішінде медициналық пункт орнын қарастыру және тағы басқа халық көкейінде жүрген мәселелер кеңінен талқыланды.
Ауыл тұрғыны Айдос Ақшабаев жол мәселесін қозғап, «Жәйрем кен байыту комбинаты» АҚ ӘТК-нен бастап Ескі Жәйремге дейінгі жолдың нашарлығы салдарынан жүру мүмкін еместігін айтты. Сонымен қатар, ауылда медициналық пункттің жоқтығынан дәрігер берген ем-домды алу үшін бірнеше шақырым жердегі кент орталығына баруға мәжбүр екенін айтып, медициналық бекет салу қажеттігін жеткізді.
Зейнеткер Амина Мұқанова алда жоспарланып отырған газ тарту жұмыстары жүзеге асқанда, әр үйдің ауласына газ құбырын кіргізу кезінде зейнеткерлерге жеңілдіктер қарастырыла ма деген сұрақ қойды. Сонымен қатар, мүгедектігі бар адамдарға су мен электр жарығы үшін төлемде жеңілдіктер қарастыру және ауылда бос жүрген қаңғыбас иттердің уақытылы ауланбауы мәселесін көтерді.
№1 жалпы білім беретін мектеп мұғалімі Манар Торғайбекова кент орталығы мен Ескі Жәйрем арасында жолаушылар тасымалдайтын көлік соңғы кезде жүрмейтінін, оның себебін сұрады. Ауыл тұрғыны Сәкен Шамкенов ауылға кәріз жүйесін тарту және қоқыс контейнерлерін орнату қажеттігін айтты.
Келесі тұрғын Жанбосын Смаилов ауа райы нашарлаған кезде үйге келетін электр сымдарының үзіліп қалатынын жеткізсе, Данияр Ақшабаев жол мәселесі шешілгенше ауыл ортасындағы жолды грейдермен тегістеп, шиыршық тас төсеуді және ескі мектеп ғимаратын бұзып, орнына үрмелі жабық спорт кешенін салуды «Жәйрем кен байыту комбинаты» АҚ-на жүктеу ұсынысын білдірді.
Қойылған сұрақтарға жауап берген қала әкімі Айқын Елеусізов жол мәселесі бойынша «Жәйрем кен байыту комбинаты» АҚ басшысымен кездесу жоспарланғанын және оның нәтижесі туралы қосымша хабарланатынын айтты.
Газ тарту жұмыстарына қатысты қала басшысы жалпы сомасы 17,8 млрд теңгені құрайтын қаржы бөлінгенін, бұл жұмыстар екі жылға жоспарланғанын және алғашқы кезеңі 2024 жылдың сәуір айында басталатынын мәлімдеді.
Кездесу соңында көтерілген басқа да маңызды мәселелер бойынша қала әкімі тиісті жауапты тұлғаларға нақты тапсырмалар берді.
Ескі Жәйрем халқы кездесуден жақсы әсер алып, жарқын болашаққа деген үлкен үмітпен тарқасты.
Гауһар НАУРЫЗБАЕВА