Жәйрем кентінде жаңа учаскелік полиция пунктінің ашылу салтанаты өтті. Бұл шараға Ұлытау облысы Полиция департаментінің бастығы, полиция полковнигі Қайыркен Әлиев пен Қаражал қаласының әкімі Айқын Елеусізов қатысты.
Салтанатты жиында қонақтар учаскелік полиция пунктінің маңыздылығын атап өтіп, оның тұрғындардың қауіпсіздігін қамтамасыз етуге және полиция қызметкерлерінің халықпен тығыз байланыста жұмыс істеуіне ықпал ететінін айтты. Лентаны кесу рәсімінен кейін қонақтар жаңа мекеменің бөлмелерін аралап, оның қызметімен және мүмкіндіктерімен танысты.
Жаңа учаскелік полиция пунктінде төрт учаскелік полиция инспекторы жұмыс істейді. 2025 жылдың Ішкі істер министрлігі тарапынан «Профилактика жылы» деп жариялануына байланысты инспекторлардың жұмысына ерекше көңіл бөлінбек. Олар қылмыстың алдын алу, қоғамдық тәртіпті сақтау және тұрғындардың қауіпсіздігін қамтамасыз ету бағытында профилактикалық шараларды күшейтеді.
«Бұл ғимарат – жергілікті тұрғындар үшін құқық қорғау органдарына жүгінетін маңызды орын болмақ. Полиция қызметкерлері кез келген жағдайға жедел әрі тиімді жауап беріп, кент көшелеріндегі тыныштық пен қауіпсіздікті қамтамасыз ететін болады», – деп атап өтті Қайыркен Әлиев.
Жаңа учаскелік полиция пунктінің ашылуы – құқық қорғау саласындағы маңызды қадам. Бұл қадам Жәйрем кентіндегі құқықтық тәртіпті нығайтуға және тұрғындардың полицияға деген сенімін арттыруға бағытталған.