Ұлытау облысында өңірдің экономикалық дамуына серпін беретін маңызды халықаралық кездесу өтті. Облыс әкімі Дастан Рыспеков қытайлық ірі инвестициялық құрылым – «Синьсинь» ЖШС өкілдерімен жүздесіп, өңірдің инвестициялық әлеуеті мен бірлескен инфрақұрылымдық жобаларды жүзеге асыру мүмкіндіктерін талқылады.
Кездесу барысында тараптар Ұлытау облысының экономикалық мүмкіндіктері, өндірістік және көлік инфрақұрылымын дамыту перспективалары жөнінде жан-жақты пікір алмасты.
Аймақ басшысы өңірде жүзеге асырылып жатқан және жоспарланған стратегиялық жобаларға тоқталып, шетелдік инвесторлар үшін қолайлы жағдай жасалып отырғанын атап өтті.
Облыс әкімдігі инвестиция тарту саясатының ашық әрі ұзақмерзімді серіктестікке негізделгенін жеткізіп, өңірдің логистикалық және географиялық артықшылықтарын ерекше атап өтті.
Ұлытау облысы елдің орталығында орналасуы арқылы транзиттік және көлік-логистикалық бағыттарды дамытуға қолайлы өңір саналады.
Кездесу барысында «Синьсинь» ЖШС өкілдері компанияның қызметі туралы кеңінен ақпарат берді.
Инвесторлар корпорацияның 30 жылға жуық уақыт бойы инженерлік құрылыс, сауда-интеграциялық индустрия және тұрғын үй құрылысы салаларында табысты жұмыс істеп келе жатқанын атап өтті.
Сондай-ақ, компанияның Қазақстан нарығында он жылдан астам уақыт бойы белсенді қызмет атқарып, түрлі инфрақұрылымдық және құрылыс жобаларына қатысып келе жатқаны айтылды.
Бұл тәжірибе тараптардың өзара сенім мен ұзақмерзімді әріптестікке негізделген ынтымақтастық құруына мүмкіндік береді.
Өз кезегінде облыс әкімі өңірдегі жолкөлік инфрақұрылымын дамыту бағытындағы бірқатар ірі жобаларды таныстырды.
Атап айтқанда, көлік қатынасын жақсартуға және транзиттік әлеуетті арттыруға бағытталған бастамаларға ерекше назар аударылды.
Кездесу барысында инвесторларға Ұлытау – Алғабас – Шұбаркөл – Баршын – Қорғалжың – Астана автомобиль жолын салу, Жезқазған қаласының айналма жолын салу жобасы сынды стратегиялық жобалар ұсынылды.
Бұл жобалар өңірдің көлік инфрақұрылымын жаңа деңгейге көтеріп, жүк және жолаушы тасымалының тиімділігін арттыруға бағытталған.
Сонымен қатар, жол желісінің дамуы инвестициялық тартымдылықты күшейтіп, жаңа экономикалық мүмкіндіктерге жол ашады.
Кездесу қорытындысы бойынша қытайлық инвесторлар ұсынылған жобаларға ерекше қызығушылық танытты.
«Синьсинь» ЖШС өкілдері аталған автомобиль жолдарын салу және Жезқазған қаласының айналма жолын дамыту бастамаларына қатысуға ниетті екендерін жеткізді.
Тараптар бұл жобалардың өңірдің әлеуметтік-экономикалық дамуына оң әсер ететінін атап өтіп, бірлескен іске асыру тетіктерін жан-жақты қарастыруға келісті.
Кездесу соңында Ұлытау облысы әкімдігі мен «Синьсинь» компаниясы алдағы уақытта өзара ынтымақтастықты нығайтуға, инвестициялық жобаларды тереңірек пысықтауға және нақты іске асыру кезеңіне көшуге уағдаласты.
Бұл бастама өңір экономикасын әртараптандыруға, инфрақұрылымды дамытуға және халықаралық инвестициялық байланыстарды кеңейтуге маңызды қадам болмақ.
Сайып келгенде, Ұлытау облысының инвестициялық ашықтығы мен стратегиялық жобаларға дайын болуы өңірдің болашағына зор үміт сыйлайды.
Шетелдік серіктестермен орнатылған мұндай байланыстар экономикалық өсімге ғана емес, жаңа жұмыс орындарының ашылуына және өңірдің инфрақұрылымдық жаңғыруына да жол ашады.
Ізтай БЕЛГІБАЙҰЛЫ