Әлем қанша өзгерсе де, адамның басты құндылығы – еңбекке деген адалдығы болып қала береді. Еңбек – адамды биіктететін, тұлға ретінде қалыптастыратын қасиетті күш. Ал сол еңбекті күнделікті өмірінде шынайы жүзеге асырып жүрген – еңбек адамы.
Еңбек адамы – атақ үшін емес, нәтиже үшін жұмыс істейтін жан. Ол — таңсәріден тіршіліктің қамын жасап, қоғамның тынысын үзбей келе жатқан қарапайым, бірақ қадірлі тұлға. Көбінесе олар үлкен мінберлерден көрінбейді, теледидардан аты атала бермейді. Бірақ дәл солардың қолымен жол салынып, егін өсіп, ауру жазылып, балалар білім алып жатыр.
Еңбектің бағасы әрқашан биік. Ауылда таңмен тұрып, жер жыртатын механизатор да, отын жарып, ауылын жылумен қамтып отырған коммуналдық жұмысшы да – өз ісінің шебері. Қалада көпқабатты үй салып жатқан құрылысшының да, түнгі ауысымда науқастың жанынан табылатын медбикенің де орны ерекше. Олар жай ғана жұмыс жасап жүрген жоқ – олар қоғамның іргетасын берік етіп отыр.
Қазіргідей технология мен жылдамдық заманында еңбек адамына деген сұраныс азаймайды. Керісінше, шынайы, адал еңбектің қадірі арта түседі. Өйткені робот пен жасанды интеллект адам жаны мен жүрегін алмастыра алмайды. Ал нағыз еңбек адамы – жұмысқа жүрекпен кірісетін жан.
Бүгін біз жастарды шабыттандыру үшін танымал адамдардың емес, қарапайым еңбек адамдарының өмірін үлгі етуіміз керек. Өйткені олар – елге шын мәнінде тірек бола білгендер. Адал еңбек еткен адамның жүзі жарық, ниеті таза болады. Мұндай адамдар қай қоғамда да құрметке лайық.
Арынғазы Такибаев
Қаражал қаласы Қоғамдық кеңесінің төрағасы