Ағымдағы жылдың 19-22 наурыз аралығында Москва қаласында бокстан Ресей Федерациясының Еңбек сіңірген Спорт шебері, Олимпиданың күміс жүлдегері және Еуропаның бірнеше дүркін жеңімпазы Софьи Очигаваның жүлдесіне арналған Халықаралық турнирі өтті. Аталған турнирге қатысқан Ұлытау облысының жасөспірім қыздар құрама командасында Жәйрем кентінің де боксшы қыздары болды. Олар жай ғана барып қайтқан жоқ. Қоржындарына бір алтын, бір қола арқалап қайтты.
Ресей елінде, дәл Москваның төрінде 10 мемлекет қатысқан тартысты додада кішкентай қыздарымыз қарсыластарын ойсырата жеңіп, алтын, қола иеленді.
Москва қаласының мықты боксшысы Фатима Тагибековамен жұдырықтасып, осымен екінші рет алтын әперіп отырған қызымыз Айару Файзуллаева 2023 жылдан бері бокстан Қазақстан Республикасының спорт шебері, Қазақстан Республикасының «Құрметті спорт ққызметкері» төсбелгісінің иегері, Қазақстан Республикасының «Ерен еңбегі үшін», «Парасатты педагог», «Үздік педагог» төсбелгілерінің иегері, Ұлытау облысының бокстан вице-президенті Рымғали Мұздыбаевтан жаттығады.
Жұдырықтасу спортының шеберінің болашағынан зор үміт күттіріп отырған шәкірті. Ұлытау облысының бірнеше дүркін чемпионы, Астана, Павлодар, Қарағанды қалаларында өткен республикалық турнирлердің чемпионы, Шымкент қаласында өткен Қазақстан Республикасы чемпионатының чемпионы.
Ал, қола иеленіп, үшінші орын алған Аянат Ахмет те осал емес. Ол былтырғы жылы Екібастұз қаласында өткен Қазақстан Республикасы чемпионатының қола жүлдегері болды. Астана, Қарағанды қалаларында өткен республикалық турнирдің чемпионы облыстық турнирлердің бірнеше дүркін чемпионы болды. Ал, үшінші шәкірті Айлин Серікова төртінші орынды иеленді. Айлин де өте білікті былғары қолғап шебері. Болашағы жарқын.
Ұлытау облысының құрама командасында біздің спортшылармен бірге болған жаңаарқалық Айша Әбілқас (бапкері Шыңғыс Сәлкеұлы) 2 орын, жезқазғандық қыз балалар Нұрайым Құдайберген (бапкері Абылай Бекен), Балым Ғабиткызы (бапкері Айдар Сайдалин) 2 орын алып, күміс иеленді.
Құттықтаймыз! Ауылымызды алтынмен көмкере беріңіздер! Әлем чемпионы атаныңыздар!
Ел ішінде: «Әйел баласы жаратылысынан нәзік болып келеді. Ал, мұндай спорт түрлері қыз балаларды нәзіктіктен айырып жіберетін секілді, әрі бірін — бірі тоқпақтап жүрген қыз балаларға жараспайтын сияқты. Одан гөрі қыз балаларға спорттық гимнастика, көркем гимнастика, мәнерлеп сырғанау тәрізді спорт түрлері жарасымды» деген пікірлер де бар. Бұл дұрыс та шығар. Алайда, қазіргі неше түрлі жағдайлар болып жатқан қоғамда өз басым қыз балаға үйде де, түзде де, тұрмыста да бұл спорт түрі артық болмас деп ойлаймын.
Теректі ШАҒАТАЙ.