Ұлытау облысында жылына 50 мың тонна қалдықты қайта өңдеуге қауқарлы цех салынады. Бұл мәселе жайында өңір басшысы Дастан Рыспеков ҚР Үкіметінің отырысында мәлімдеді, дейді облыс әкімінің баспасөз қызметі.
Инвестжобаны іске қосу үшін Жезқазған мен Сәтбаев қалаларының ортасынан жалпы ауданы 16 га жер телімі бөлінді. Қалдықтарды қайта өңдеу цехын 2026 жылы іске қосу жоспарлануда. Ал, барлық комплекс 2027 жылы аяқталады, ол аяқталғанға дейін цехқа қалдықтар қолданыстағы полигондардан жеткізіліп тұрмақ.
Жобаның жалпы құны 840 миллион теңге, оның ішінде инвестордың өз қаражаты 134 млн теңгені, ал, 705 млн теңге лизингтік қаржыландыру сомасын құрайды, бұл қаражат Өнеркәсіпті дамыту қоры арқылы 2025 жылғы 18 наурызда мақұлданды. Болашақта бұл инвестор қалдықтарды жинау мен шығарудан бастап оны қайта өңдеуге дейін толық циклмен айналысуды жоспарлап отыр.
Сонымен қатар, Үкімет отырысында Жәйрем кен байыту комбинатымен меморандум аясындағы жоба жайында да айтылды. Қазіргі күні Жәйрем кентінен қатты тұрмыстық қалдықтарды сұрыптайтын желісімен полигон салу үшін 15 га жер телімі бөлінді.
Жобалық-сметалық құжаттамасы әзірленуде. Дайын болғаннан кейін Жәйрем кен байыту комбинатымен бірлесіп полигонды одан әрі салу мәселесі қарастырылатын болады.
Досан ДУЛЫҒАЛЫ.