Көктемнің шұғылалы шуағын ала келген, жаңару мен жасампаздықтың, ырыс пен берекенің бастауы болған Наурыз мерекесі биыл да Қаражал қаласында ерекше сән-салтанатымен тойланды. Түркі халықтарының ең ұлық мейрамы әр жыл сайын дәстүрлі түрде ұйымдастырылып, қаламыздың мәдени өміріне көрік беріп келеді. Әдеттегідей биылғы жылы да мерекенің ауқымы кеңейіп, он күндік іс-шаралар легімен ерекшеленді.
Қаражалдықтар Ұлыстың ұлы күнін кең көлемде атап өтіп, мейрамды ұлттық дәстүр мен салт-санаға сай қарсы алды. Әрбір мекеме өз жұмыс орындарын Наурыз нақышында безендіріп, қызметкерлер ұлттық киім киіп, мейрамның ажарын аша түсті. Наурыздың басты күні – 22 наурызда Қаражал қаласы нағыз мерекелік думанға бөленді. Қаланың мәдени-сауық орталығының аумағы халыққа лық толып, шат-шадыман күйге енді. Ұлттық өнер көрсетіліп, сахна бір сәтке де босамады. Ең алдымен, қала әкімі Айқын Елеусізов халықты Наурыз мейрамымен құттықтап, ақжарма тілегін білдіріп, салтанатты жиынның шымылдығын ашып берді. Өз сөзінде:
– Қайырлы күн, барша жиналған қауым мен қала қонақтары! Сіздерді, баршаңызды Ұлыстың ұлы күні — Наурыз мейрамымен шын жүректен құттықтаймын. Әз Наурыз бұл тек қана Жаңа жылдың бастауы ғана емес, табиғат пен адамның үндестігін білдіретін ізгілік пен жасампаздықты дәріптейтін мейрам. Бұл күні жер жаңарып, тіршілік қайта түлеп, күн мен түн теңеседі. Қазақ халқы бұл мерекені ғасырлар бойы татулық пен бірліктің, мейірімділік пен жаңғырудың символы ретінде тойлап келеді. Қазіргі таңда өңіріміз өсіп, өркендеп, жаңа жетістерге жетуде. Бұл ел игілігі үшін еңбек етіп жүрген әрбір азаматтың табанды еңбегінің жемісі деп ойлаймын. Ал, бірлігі жарасқан елдің берекесі артып, болашағы жарқын болатындығы сөзсіз. Осы көктем мерекесі әр шаңыраққа құт-береке, ырыс-ынтымақ алып келсін. Отбасыларыңызға амандық, дендеріңізге саулық тілеймін.
Еңбектеріңіз жана берсін. Ұлыс оң, ақ мол болсын, ағайын, — деп сөзін аяқтады.
Бұл құттықтау жиналған жұртшылыққа ерекше көтеріңкі көңіл-күй сыйлады. Облыс төрінен келген жезқазғандық өнерпаздардан құрылған «Алға, бас!» атты тобы ән мен жыр, ұлттық ойындар, түрлі қойылымдар қойып, көпшіліктің көңілінен шығып, мерекенің сәнін арттырды. Яғни, «Армысың, әз Наурыз!» атты концерттік бағдарламасымен басталған мереке салт-дәстүрлермен жалғасты. Қаражалдағы Наурыз мерекесі халықтың бірлігін, татулығын, салт-дәстүрге деген құрметін айшықтайтын айрықша шара болды.
Күн мен түн теңесіп, жер беті жаңарған шақта тойланған бұл мейрам жұртшылыққа жылылық сыйлап, ырыс пен берекенің бастауы болды. Мерекенің ең әсерлі сәттерінің бірі – әр мекемеге жүктелген тапсырма аясында тігілген 8 киіз үйдің ұлттық нақышта безендірілуі мен дастархан жайылуы болды. Киіз үйлердің ерекше көркем безендірілуі мен қонақтарға ұсынылған дәстүрлі тағамдар нағыз қазақы қонақжайлылықтың үлгісін көрсетті. Бұл байқаудың басты талабы – көрермендердің көңілінен шығып, ең әсерлі әрі есте қаларлық киіз үй болу еді.
Байқау қорытындысы бойынша Бас жүлде мен 100 мың теңгелік сертификатты № 1 жалпы білім беретін мектеп пен «Балбөбек» бөбекжайы жеңіп алды. № 3 және № 7 мектептері бірінші орын мен 80 мыңдық сертификатты иеленсе, екінші орын аймақтық мемлекеттік органдар, «Қазыналы өңір» газетінің редакциясы, қалалық аумақтық сайлау комиссиясы ұжымдарына бұйырып, 70 мың теңгелік сертификтты жеңіп алды. Ал, үшінші орын мен 60 мыңдық сертификат «Өркен-Атасу» ЖШС «Өркен» өкілдігінде берілді. Қатысқан барлық мекемелер ынталандыру ретінде 40 мың теңгелік сертификаттармен марапатталды. Сол күні қала алаңында бірнеше қайырымдылық дастарқандары жайылып, халыққа қазақтың ұлттық тағамы, бауырсақ таратылды. Бұл игі істі қаламыҚаражал төріндегі ұлық мейрам здың белсенді жастары Ақбота Әбенова мен Назгүл Серғазина қала тұрғындарына мерекелік көңіл-күй сыйлап, Наурыздың жылы лебізін жеткізу мақсатында әрбір бауырсақтың ішіне тек жақсылық, бақыт пен қуаныш тілектерін жазып, халыққа таратты. Сондай-ақ, қаламыздың жастар ресурстық орталығының қызметкерлері «Бауырсақ-пати» этно-конкурсын ұйымдастырып, жиылған жұртқа ыстық бауырсақтан ауыз тигізді. Аталмыш конкурсқа бірнеше қыз-келіншектер қатысты. Қазылар алқасының шешімі бойынша Қаражал қалалық орталық ауруханасының қызметкері Іңкәр Әнуарова бірінші орынды ұтып алды. Ал, екінші орын Қаражал қалалық сот мекемесінің қызметкері Эльмира Жамауоваға бұйырды. Дзюдо мектебінің жаттықтырушысы Ақбота Әбенова 3 орынға ие болды. Барша қатысушылар ұлттық тағамды дайындауда өз шеберліктерін жоғары деңгейде көрсете білді. Қаражал қаласының ішкі саясат, мәдениет, тілдерді дамыту және спорт бөлімі де қалыс қалмай бірнеше сайыстарды өткізді. Қазақ күресі бойынша -70 және +70 келі салмақ дәрежесінде қалалық турнир өткен болатын. -70 келі салмақ дәрежесі бойынша Бейбарыс Еренғайып нағыз палуан екенін дәлелдеп, жеңімпаз атанды. Ақжол Егінтаев ІІ орын иеленсе, Қуаныш Төлеген ІІІ орынды қанағат тұтты. Ал, +70 келі салмақ дәрежесінің жеңімпазы Ұлан Наукен атанды. ІІ орын Жансерік Жандосұлына бұйырды. Ал, ІІІ орынды Нұртілеу Батырбек иеленді. Наурыз мейрамына арналған асық атудан қалалық турнир де өз жеңімпаздарын анықтады. Дамир Орынбек мергендігін дәлелдеп, І орынды иеленді. Ал, Дарын Сағынгерей ІІ орын алса, Бекжан Бейбітұлы ІІІ орынға мәз болысты. Сондай-ақ, қол күрестен +70 келі салмақтан Мергенбай Сембек І орынды иеленді. Нұрсәт Оралбай ІІ орынға табан тіресе, ІІІ орынды Әділхан Қадіров алды. Ал, 70 келі салмақтан қол күрестен І орынды Алып Жанабаев иеленсе, ІІ орынға Жаһангер Ілиясов ие болды. Ал, Наурызбай Айтбек ІІІ орынды місе тұтты. Спортшылар арасынан кір тасын көтерушілер де аз емес екен. Ересектер арасында Қайрат Хамзин белсенділік танытып, жеңімпаз атанды. Ал, Қуаныш Төлеген ІІ орынды иеленді. ІІІ орынды Ерсұлтан Сембек місе тұтты. Балалар арасында кір тасын көтеруде І орынға Абдулла Нұрлан ие болды. ІІ орынды Бекжан Бейбітұлы иеленсе, ІІІ орынға Әли Арынғазы табан тіреді. Сондай-ақ, ләңгіден І орын Дәулен Жетімековке бұйырса, ІІ орынды Мағжан Айтбек алды. ІІІ орынды Нұрсұлтан Сапарбек місе тұтты. Осылайша спорттық мерекелік іс-шаралар да өз деңгейінде тәмамдалды. Иә, Наурыз – халық үшін ұлан-асыр той. Өмірдің жаңаратын, нұрдың молығатын, пейілдің түзелетін, көңілдің кеңейетін кезеңі. Бір мейрамда қаншама игі істер қамтылып, біршама ізгі ниеттер көрсетілді. Сол үшін де алар орны биікте, тарихы да тереңде. Ұлтымыздың мерейін өсіріп, бар болмысымызды айшықтайтын қасиетті – Наурыз мерекесі елімізге, әрбір отбасына бірлік пен қуаныш, құт-береке, бақыт пен молшылық әкелсін!