Бұл шара Наурызнаманың алтыншы күні – «Жаңару күнінде» жүзеге асырылды. Облыс орталығы Жезқазған қаласына өнерден шашу шаша барған Қаражал қаласы мен Жәйрем кентінің өнерпаздары бұл мерекенің шымылдығын осы шарамен ашты. Яғни, мысты қалаға кенді өлкеден тарту ретінде үш түп қарағай көшеттерін сыйға берді.
«Наурызнама» бойынша ел өмірінде және әрбір қазақстандықтың өмірінде жаңа кезеңнің басталуын білдіретін «Жаңару күні» Ұлытау облысының өңірінде ерекше тойланады. «Алаш» алаңындағы сахнада Қаражал-Жәйрем өңірінің өнерпаздары мың бұрала билеп, күмбірлете күй төгіп, әуелете ән шырқады. Сахна жанындағы қос кигіз үйде көрме ұйымдастырылып, ұлттық тағамдарға толы дастархан жайылды. Қала тұрғындары мен алыс-жақыннан келген меймандары мерекелік концертті тамашалап, наурыз көже мен қымыздан ауыз тиді. Тамашаға жиналған ел дастарханға жайғасып, ұлттық тағамдардан жеп бір марқайып қалды.
– Жаңару күні – Қазақстан халқы үшін ерекше мәні бар мереке. Бұл күн әрбір қазақстандықтың өміріндегі жаңа кезеңнің, жаңа мүмкіндіктер мен жаңалықтардың бастамасы ретінде тойланады. Наурыз мейрамы тек табиғаттың жаңаруы мен көктемнің келуін ғана емес, сонымен қатар, адамзаттың рухани жаңғыруын, ұрпақтар сабақтастығын, дәстүрлер мен мәдениеттің қайта жаңаруын да білдіреді. Жаңару күні елімізде жасампаздыққа, еңбекке, бақытқа және бірлікке ұмтылудың маңызды күні ретінде аталып өтіледі. Бұл күннің мәні әрқашан жақсылыққа, үмітке және жаңа табыстарға толы болғандықтан, оны отбасылар мен қоғамдастықтар бірлесе, қуанышпен қарсы алады. Бүгін сондай бір ерекше мерекенің куәсі болып отырмыз, – дейді Жезқазған қаласының Құрметті азаматы, «Қазақтың Кетбұқасы» қоғамдық бірлестігінің төрағасы Төлеген Бүкіров.
Иә, қазақстандықтар бұл күні өздерінің ішкі дүниелерін, өмір салтын қайта бағалап, рухани байлықты арттыруға, бір-біріне қолдау көрсетуге дайын болады. Бұл күн – барлық қазақстандықтарды біріктірудің, ынтымақтастық пен татулықтың нышаны.
– Елімізде Наурыз мейрамын атап өтудің дәстүрі әртүрлі. Жаңару күнін атап өту барысында қазақстандықтардың басым бөлігі ұлттық ас мәзірін дайындайды, табиғатқа шығып, туған жердің табиғатын сүйіп, адамдар бір-біріне жылулық пен қолдау көрсетеді. Адамдардың бір-біріне деген шынайы қамқорлығы, сүйіспеншілігі мен қолдауы қоғамның бірлігін нығайтады. Бұл күн – қазақстандықтардың ұлы жеңістер мен жетістіктерге ұмтылатын, армандары мен мақсаттарына жетуге күш-қуат алатын күні. Осы мерекеге біздің Қаражал-Жәйрем өңірінің жұртшылығы да үлкен дайындықпен келіп, облыс жұртшылығына қызық-қуаныш сыйлауда. Мына көздің жауын алатын ұлттық бұйымдар қазыналы өңір тұрғындарының үйінен жиналған жәдігерлер. Бізде осылардың басын біріктіретін музей болмаса да, музейдің көзі саналатын халықтың қазынасы мол. Біз соларды жұртшылыққа арнайы әкеліп көрсетіп отырмыз. Бұл да ұрпақтар сабақтастығы, рухани жаңарудың жолы, – дейді Қаражал қалалық ішкі саясат, мәдениет, тілдерді дамыту және спорт бөлімінің басшысы Гүлмира Исина.
Сонымен, «Жаңару күні» мерекесінде облыс орталығында түрлі мәдени іс-шаралар ұйымдастырылды. Оған облыстың қазыналы өңірі Қаражал мен Жәйремнің жұртшылығы мұрындық болды. Өнерпаздарды қала әкімінің орынбасары Диана Оспанбекова мен бірнеше бөлім басшылары бастап барды. Мерекелік шарада музыка, би, басқа да өнер түрлері арқылы халқымыздың бай мәдени мұрасы насихатталды. Ұлттық спорт түрлерінен де жастар күш сынасып, сый-сияпатқа кенелді.
Наурыз мерекесінде өзіміздің ұлттық құндылықтарымызды сақтап, жаңаша көзқараспен оларды дамыта отырып, ұрпақтан ұрпаққа жеткізу маңызды. Бұл жаңа дәуірдің бастамасы, еліміздің дамуында жаңа жетістіктерге жетуге деген жігер мен ынтымақтастықтың күні ретінде бағаланады. Ал, «Жаңару күні» – өткенді ұлықтап, болашаққа ұмтылуға, жаңаша көзқараспен өмір сүруге мүмкіндік береді. Бұл – жаңа бастамалардың, жаңа арман-тілектердің уақыты. Жаңару күні елімізді дамыту жолындағы жаңа жеңістердің бастамасы болсын!
Ізтай БЕЛГІБАЙҰЛЫ