Қаражал қаласы мен Жәйрем кенті – Ұлытау облысының өндірістік әлеуетін айқындап, аймақ экономикасының берік діңгегіне айналған жүйе құраушы аумақтар. Өнеркәсібі өркендеген бұл мекендердің ел экономикасына қосар үлесі орасан зор. Дегенмен, өндірістік қарқынмен қатар тұрғындардың тұрмыс сапасын арттыру – бүгінгі күннің басты талабы. Осы мақсатта Ұлытау облысының әкімі Есет Байкен Қаражал қаласы мен Жәйрем кентіне арнайы жұмыс сапарымен келіп, аймақтағы өзекті мәселелер мен стратегиялық маңызы бар жобалардың жүзеге асу барысын жіті саралады.
Аймақты дамытудың негізгі тетіктерінің бірі – заманауи инженерлік инфрақұрылым қалыптастыру. Жұмыс сапары кезінде өңір басшысының ерекше назарында елді мекендерді газдандыру, тұрғындарды сапалы ауызсумен және тұрақты электр энергиясымен қамтамасыз ету сияқты маңызды бағыттар болды. Отынның экологиялық әрі тиімді түріне көшу өңірдің экологиясын жақсартып, халықтың тұрмысын жеңілдетсе, таза ауызсу мен үздіксіз электр қуаты – тұрғындардың сапалы өмір сүруінің басты кепілі. Бұл жобалардың кезең-кезеңімен, сапалы іске асуы аймақ басшысының тікелей бақылауына алынды.
Сонымен қатар, сапар барысында әлеуметтік салаға, әсіресе, өсіп келе жатқан жас ұрпақтың білім алу жағдайына ерекше мән берілді. Реновация бағдарламасы аясында Қаражал мен Жәйремдегі білім беру ошақтарын заманауи талаптарға сай жаңғырту басты назарда тұр. Мектептерді жаңарту – жай ғана ағымдағы жөндеу емес, бұл балалардың заманауи, қауіпсіз әрі жайлы ортада сапалы білім алуына жасалған стратегиялық қадам. Бағдарлама аясында ғимараттардың ішкі-сыртқы келбеті жаңартылып, білім шаңырақтары заманауи құрал-жабдықтармен қамтамасыз етілмек.
Облыстың болашағы мен халықтың жайлы ортада өмір сүруі жолында басталған бұл ауқымды бастамалар облыс әкімінің жеке бақылауында болады.
Өз тілшімізден.