Қызылорда-Жезқазған бағыты бойында асфальт төсеу басталды
Ұлытау өңірі арқылы өтетін республикалық маңызы бар А-17 автожолының қайта жаңғыруы – ел көлік инфрақұрылымын дамытудағы маңызды қадамдардың бірі.
Бүгінгі таңда «Қызылорда–Жезқазған» бағытының 216–424 шақырым аралығындағы учаскесінде құрылыс-монтаж жұмыстары белсенді түрде атқарылуда. 2025 жылдың 19 шілдесінен бастап осы жол бөлігінде асфальт төсеу жұмыстары басталды. Бұл жұмыстар еліміздің батыс және орталық өңірлерін байланыстыратын негізгі көлік дәліздерінің бірі – А-17 тасжолының сапасын жақсарту мақсатында қолға алынған.
Жобаның үйлестірушісі, Ұлытау облыстық филиалының басшысы Мерей Бүркітбайұлының айтуынша, жол құрылысы бекітілген жоспар-кестеге сәйкес жүргізілуде. Асфальт төсеу жұмыстары басталған учаскелерде ауыр техникалар мен жол құрылысшыларынан құралған бірнеше бригада күнделікті еңбек етуде.
– Бұл учаске Қызылорда мен Жезқазған арасындағы жолаушы және жүк тасымалы үшін стратегиялық маңызды. Жол төсемінің сапасы мен төзімділігіне ерекше мән берілуде. Қолданыстағы құрылыс нормаларына сәйкес, бірнеше қабатты асфальт-бетон төсеу, жол негізін нығайту және су өткізу құрылғыларын орнату жұмыстары қатар жүргізіліп жатыр, – дейді Мерей Бүркітбайұлы.
Айта кетейік, Қызылорда–Жезқазған тасжолы бұған дейін ұзақ жылдар бойы жөндеу көрмей, ел арасында сынға жиі ұшырап келген болатын. Ендігі мақсат – бұл жолды заманауи стандарттарға сай қайта жаңғыртып, халықтың қауіпсіз әрі жайлы жүруін қамтамасыз ету.
Жобаны жүзеге асыру барысында қауіпсіздік техникасы, экологиялық талаптар және қозғалысты шектеу ережелері де толық сақталуда. Жөндеу жұмыстары кезеңінде қозғалыс ішінара шектеліп, уақытша айналма жолдармен қамтамасыз етілуде. Жол бойында ескерту белгілері орнатылып, арнайы қызметкерлер бақылау жүргізуде.
Алдағы уақытта бұл бағытта тек асфальт төсеу ғана емес, жол жиектерін нығайту, белгілерді орнату, жарықтандыру мен қауіпсіздік құралдарын жаңарту жұмыстары да жалғасатын болады.
Ұзындығы 208 шақырымды құрайтын бұл жол телімінің қайта жаңғыртылуы Жезқазған мен Қызылорда облыстарының арасындағы экономикалық, мәдени және әлеуметтік байланыстарды одан әрі нығайтуға мүмкіндік береді.
Мақаланы дайындау барысында филиал басшысы Мерей Бүркітбайұлына аталмыш жобаны қаржыландыру және жұмыс барысы жайлы бірқатар сұрақтар қоюдың да сәті түсті.
– Бұл жол – еліміздің батысы мен оңтүстігін жалғайтын маңызды көлік дәлізі. Жезқазған мен Қызылорда арасындағы қазіргі жол бұрынғы советтік кезеңде салынған, біршама ескірген, әрі техникалық талаптарға толық сай келмейді. Жаңа жолдың салынуы аймақаралық қатынасты жеңілдетіп қана қоймай, экономикалық және әлеуметтік дамуға үлкен серпін береді.
– Құрылыстың жалпы ұзындығы мен техникалық сипатына тоқталып өтсеңіз.
– Жобаның жалпы ұзындығы – шамамен 428 шақырым. Құрылыстың бірнеше кезеңге бөлініп іске асырылып жатқанын айта кеткен жөн. Қазіргі таңда 202 шақырымға жуық бөлігінде жұмыстар басталды. Бұл – II техникалық санаттағы жол, яғни, екі жолақты, ені 9 метрге дейін, жол жиегінде қауіпсіздік элементтері, су өткізу құбырлары және мал өткелдері қарастырылған.
– Қазіргі күні нақты қандай учаскелерде жұмыс жүргізіліп жатыр?
– Қазіргі уақытта құрылыс Жезқазғаннан оңтүстікке қарай бағыт алған учаскелерде қызу жүріп жатыр. Мердігер мекемелерге нақты міндеттер жүктеліп, қажетті техника мен жұмыс күштері тартылған. Жолдың табанын нығайту, қиыршық тас төсеп, асфальтбетон жабындысын төсеу жұмыстары қарқын алды.
– Қаржыландыру мен мерзім мәселесі қалай шешіліп жатыр?
– Жоба республикалық бюджет есебінен қаржыландырылуда. Биылғы жылға бөлінген қаражат толық игеріліп жатыр. Негізгі жұмыстар 2026 жылдың соңына дейін аяқталады деп жоспарланған. Дегенмен, біз барынша ертерек бітіруге күш салып отырмыз.
– Бұл жолдың іске қосылуы өңір тұрғындарына қандай пайда әкеледі?
– Ең алдымен, бұл – тұрғындардың қатынас жолын жеңілдетеді, жол жүру уақыты қысқарады. Екіншіден, ауыл-аймақтардағы өнімдерді тасымалдау жеңілдейді, бұл жергілікті экономикаға оң әсерін тигізеді. Үшіншіден, жол бойындағы инфрақұрылым дамып, жаңа жұмыс орындары ашылады. Қазіргі құрылыс жұмыстарына да жергілікті кадрлар тартылып отыр.
– Жоба аясында экологиялық немесе жергілікті ерекшеліктер ескерілді ме?
– Әрине, жол салу барысында Қарақұм өңірінің табиғи ерекшеліктері ескерілді. Құм көшкінінің алдын алу үшін арнайы инженерлік шешімдер қабылданды. Сондай-ақ, жол бойындағы флора мен фаунаны сақтау үшін мал өткелдері мен су жинау арналары қарастырылған.
– Халыққа не айтқыңыз келеді?
– Бұл – барша аймақ үшін маңызды жоба. Халықтың қолдауын сезініп отырмыз. Уақытша қиындықтарға түсіністікпен қарап, құрылыс жұмыстары кезінде қауіпсіздік ережелерін сақтауға шақырамыз. Ең бастысы – бұл жол ертеңгі күннің игілігіне қызмет ететін болады.