Жезқазған қаласында ел көптен күткен маңызды жоба – жаңа мешіт құрылысы басталды. Көлемі мен көркі келіскен құлшылық ордасы 3000 адамға арналған. Бұл – қала мен аймақ тұрғындары үшін зор рухани оқиға.
Жоба Қазақстан мұсылмандары діни басқармасының белсенді қолдауымен, «Қазақмыс корпорациясы» ЖШС-нің демеушілігі және Ұлытау облысы әкімдігімен өзара түсіністік пен ынтымақтастық туралы арнайы меморандум аясында жүзеге асырылуда.
Жоспарға сәйкес, мешіттің ішкі құрылымы заман талабына сай әрі ұлттық дәстүрге негізделіп жобаланған. Ерлер мен әйелдерге арналған бөлек залдар, дәрет алатын жайлар, кітапхана, діни білім беретін оқу сыныптары, конференц-зал мен әкімшілік кабинеттер қарастырылған.
Сонымен қатар, келушілерге ыңғайлы болуы үшін автотұрағы бар абаттандырылған аумақ та қамтылған. Қазіргі уақытта құрылыс алаңында дайындық жұмыстары аяқталып, нысанның монолитті іргетасын құю жұмысы басталды. Бұл – құрылыс барысындағы алғашқы маңызды кезеңдердің бірі.
Жобаны толық аяқтау мерзімі 2026 жылдың IV тоқсанына жоспарланып отыр. Құрылыс құны – 3,2 миллиард теңге.
Жезқазғандық жұртшылық бұл бастаманы ерекше қуанышпен қабылдады. Өйткені, жаңа мешіт – тек құлшылық орны ғана емес, сонымен қатар, жастарға діни тәрбие беріп, рухани-ағартушылық жұмыстар жүргізетін орталыққа айналмақ.
Мешіттің бой көтеруі – Ұлытау өңіріндегі рухани дамудың нақты көрінісі. Ел бірлігін, имандылық пен ізгілікті насихаттайтын мұндай жобалардың көпшіліктің қолдауына ие болып жатқаны қуантады.