Ұлытау облысына арнайы жұмыс сапарымен келген Қазақстан мұсылмандары діни басқармасының төрағасы, Бас мүфти Наурызбай қажы Тағанұлын облыс әкімі Дастан Рыспеков қабылдады.
Маңызды кездесуде өңірдегі діни ахуал, рухани тұрақтылықты сақтау, тұрғындардың діни сауатын арттыру және ұлттық құндылықтарды дәріптеу мәселелері кеңінен сөз болды.
Аймақ басшысы мен Бас мүфти өңір халқының діни өміріне қатысты бірқатар өзекті жайттарға тоқталып, ортақ түсіністікпен шешуді қажет ететін мәселелер төңірегінде пікір алмасты.
Атап айтқанда, облыстағы мешіттерге тәжірибелі әрі білімді имамдарды тарту, дін қызметкерлерінің біліктілігін жүйелі түрде арттыру, олардың әлеуметтік жағдайын жақсарту, жастармен мақсатты әрі тиімді жұмыс жүргізу мәселелері қаралды.
Сондай-ақ, деструктивті діни ағымдардың алдын алу, қоғамдағы бейбітшілік пен келісімді сақтау бағытында ақпараттық-насихат жұмыстарын күшейтудің маңызы ерекше аталды.
Осы ретте, жергілікті билік пен діни басқарма арасындағы тығыз әріптестік, ортақ жобаларды жүзеге асырудың тиімді жолдары талқыланды.
Кездесу соңында Дастан Адайұлы мен Наурызбай қажы Тағанұлы екіжақты ынтымақтастықты одан әрі тереңдету, ел бірлігі мен рухани тұтастықты сақтау жолында бірлесе жұмыс істеу жөнінде уағдаласты.
Жезқазғанда өткен бұл жүздесу – қоғамның рухани дамуы мен діни тұрақтылығын қамтамасыз етуге бағытталған маңызды қадамдардың бірі. Ел бірлігін сақтауда, ұлттық дәстүр мен асыл мұраны дәріптеуде мұндай байланыстардың мәні зор.