Қоғамдағы әрбір сала – белгілі бір мамандық иелерінің арқасында дами түседі. Алайда соның ішінде көзге көп көрінбейтін, бірақ қоғамның үздіксіз тіршілігін қамтамасыз етіп тұрған бір саланы ерекше атап өткен жөн. Ол – жұмысшы мамандықтары.
Жұмысшы – бұл құрылысты жүргізетін құрылысшы, токпен қамтамасыз ететін электрик, жол жөндейтін техник, құрал-жабдықты басқаратын механизатор. Олардың еңбегі – физикалық ғана емес, зияткерлік күш пен техникалық дәлдікті талап ететін, аса жауапкершілікті жүктейтін сала.
Бүгінгі күні елімізде жұмысшы мамандықтарын дәріптеу ерекше маңызды. Себебі бұл – сұранысы ешқашан азаймайтын, керісінше жаңарып, заманауи талаптарға бейімделіп отыратын кәсіп түрі. Технология дамыған сайын, жұмысшының білімі мен дағдысы да соған сай болуы қажет. Бұрынғыдай тек қол күшімен емес, автоматтандырылған жүйелерді меңгеріп, өндіріс тиімділігін арттыратын, үнем мен сапаны басты орынға қоятын еңбек қажет.
Мемлекет тарапынан бұл мамандықтарға деген қолдаудың артуы – стратегиялық бағыт. Жұмысшы кадрларын даярлау, кәсіби колледждер мен техникалық білім беру ұйымдарының материалдық базасын жаңарту – келешекке жасалған маңызды қадам.
Жұмысшы – бұл жай ғана кәсіп емес. Бұл – қоғам алдындағы адалдықтың, елге деген жанашырлықтың көрінісі. Олар – үнсіз жүріп, үлкен іс тындыратын, әрбір азаматтың өміріне тікелей әсер ететін тұлғалар.
Жастар арасында бұл мамандыққа деген қызығушылықты ояту – болашақтың берік негізін қалаумен тең. Жұмысшыны құрметтеу – елді құрметтеу. Себебі ел ертеңі – еңбекке сүйенеді.
Құрмансейітов Жалғасқан Ахатұлы
«Қазыналы өңір» өңірлік газеті ЖШС директоры