Қоғамдық инфрақұрылымды дамытудың маңызды салаларының бірі – коммуналдық жүйелерді жаңғырту. Әсіресе, кәріз желілерінің қалыпты жұмыс істеуі қала тұрғындарының денсаулығы мен тұрмыс сапасына тікелей әсер ететіні белгілі. Осы тұрғыдан алғанда, Қаражал қаласында қолға алынған кәріз жүйелерін жаңғырту жұмыстары ерекше маңызға ие.
Жақында «AMANAT» партиясының Қаражал қалалық филиалы жанындағы партиялық бақылау комиссиясы «Халықпен бірге» сайлауалды бағдарламасының Жол картасы тармақтарының орындалу барысын бақылау мақсатында қаладағы кәріз жүйелерін қайта құру нысанына арнайы барып, мониторинг жүргізді.
Тексеру барысында құрылыс жұмыстары бекітілген кестеден кешігіп жатқаны анықталды. Бұл мәселе комиссия мүшелерінің назарынан тыс қалған жоқ. Олар құрылыс сапасы мен мерзімін ерекше қадағалау қажеттігін айтып, тапсырыс берушіге нақты ұсыныстарын жеткізді.
– Қаланың әрбір тұрғыны үшін таза орта мен қолайлы жағдай жасау – басты міндет. Сол себепті бұл нысанды уақытылы әрі сапалы аяқтау қажет. Біз бұған дейін де осындай жобаларды назарда ұстап келеміз, алдағы уақытта да бақылауды күшейтеміз, – деді партиялық бақылау комиссиясының мүшелері.
Комиссияның айтуынша, кәріз жүйесін жаңғырту жұмыстары уақытылы аяқталған жағдайда, Қаражалдағы тұрғындардың тұрмыс сапасы едәуір жақсарып, экологиялық қауіптің алдын алуға мүмкіндік туады.
Партиялық бақылау комиссиясы алдағы уақытта да қаладағы әлеуметтік маңызы бар жобалардың орындалу барысын жіті назарда ұстамақ.
Досан ДУЛЫҒАЛЫ.