Бұл жайлы облыс әкімі Дастан Рыспеков кеңейтілген кезекті аппарат жиынында мәлім етті. Өңір басшысының айтуынша, Ұлытау ауданының өзінде туристер қызығатын орын көп. Тек соны дұрыс пайдалана алмай отырмыз.
Аптаның басында өткен аппарат жиынында туризмнің дамуы, мемлекеттік қызметтерді жетілдіру мен цифрландыру, сәулет-құрылыс саласында атқарылған бақылау жұмыстары жайлы ауқымды әңгіме қозғалды.
Алғашқы мәселе бойынша сөз алған облыстық кәсіпкерлік және өнеркәсіп басқармасының басшысы Данияр Арынғазин өңірде атқарылып жатқан жұмыстар бойынша есеп берді. Облыс әкімі бұл ретте Жезқазған әуежайы алаңдарында ақпараттандыруды күшейту үшін креативті индустрия өкілдерін тартуды тапсырып, бөлінген қаражатты ұтымды пайдалану қажеттігін ескертті.
Аймақ басшысы сондай-ақ, келген қонақтарға туристік қызметтерді ұсынатын заңды тасымалдаушыларды іске қосуды жеделдету қажеттігін айтты. Дастан Адайұлының айтуынша, Ұлытау ауданының өзінде туристер қызығатын орын көп, десе де қызмет көрсету сапасы төмен. Сол себепті де облыс әкімі аталған салаға инвестор тартудың аса қажет екендігін жеткізді.
Жиын барысында облыс әкімі Ұлытау ауданында глэмпинг жобасын іске асыру қажеттігіне тағы бір мәрте тоқталып, «Ұлытау» геопаркін құру жұмыстарының қарқынын арттыруды, ерекше бақылауда ұстауды тапсырды.
Жиында өңір басшысы мемлекеттік көрсетілетін қызметтер халықтың құқықтары мен мүддесін қорғауға ықпал етуі тиіс екенін қадап айтып, аталған жұмыстардың сапасын жоғары деңгейде ұстауды міндеттеді. Оған қоса, қызмет бабымен электронды цифрлы қолтаңбаны қолдануда аса абай болуды, кемшіліктер жібермеуді назарда ұстау қажеттігін еске салды.
Облыс әкімі аппарат жиынының соңғы мәселесіне сәйкес, рұқсат құжатсыз құрылысты бастап кететін, оны сапасыз салатын компаниялардың жұмысына жол бермеуді қатаң ескертті. Оған қоса, үлескердің ақшасын алдын ала тартуға рұқсаты жоқ кәсіпкерлердің нысандарын үздіксіз бақылауда ұстау қажеттігін жеткізді. Өңір басшысының айтуынша, бұл – қоғамдық-саяси жағдайға әсер ететін маңызды сұрақтардың бірі.