Қоғамның дамуы мен елдің өркендеуі ең алдымен адал еңбекке сүйенеді. Еңбек адамы – мемлекеттің экономикалық қуаты мен рухани тұтастығын қалыптастыратын басты күш. Сондықтан еңбек адамының мәртебесін арттыру, оның еңбегін бағалау – ұлттық бірлікті нығайтудың маңызды тетігі.
Еңбек – адамды тәрбиелейтін және тұлға ретінде қалыптастыратын өмірлік мектеп. Әрбір жұмысшы, шебер мен өндіріс қызметкері өз ісінің нағыз маманы бола отырып, елдің дамуына өлшеусіз үлес қосады. Осындай азаматтардың табандылығы мен кәсіби шеберлігі – жаңа Қазақстанның берік іргетасы.
Президент бастамасымен жүзеге асырылып жатқан «Жұмысшы мамандықтар жылы» – еңбек адамына деген құрметті арттыруға бағытталған маңызды қадам. Бұл бастама еңбек мәдениетін дәріптеуді, кәсіптік-техникалық білімнің беделін көтеруді және жас буынды адал еңбекке баулуды көздейді.
Еңбек адамын ұлықтау – тек марапат немесе атақ беру емес, ол – қоғамдағы әділдік пен теңдік қағидатын орнықтыру, ел ішіндегі өзара сыйластық пен ынтымақты арттыру. Себебі еңбегі еленген азамат – ел болашағына сеніммен қарайды, қоғамның тұрақтылығына үлес қосады.
Бүгінгі еңбек адамы – заман талабына сай білімді, жаңашыл, іскер және жауапты тұлға. Олардың қажырлы еңбегі мен кәсібилігі – ел дамуының басты кепілі, ұлттық рухтың тірегі.