Жаңа оқу жылының қарсаңында дәстүрге айналған «Мектепке жол» қайырымдылық акциясы Қаражал қаласында кең ауқымда өтуде. «Бақытты отбасы» партиялық жобасы аясында «AMANAT» партиясының Қаражал қалалық филиалы игілікті бастаманы қолға алып, балаларға қуаныш сыйлады.
Шараға атқарушы хатшы Гүлмира Исина, облыстық мәслихат депутаты Артем Ким, қалалық мәслихат депутаттары Зәмзагүл Оспанова, Арынғазы Тәкібаев, Жұмакүл Ахметова, сондай-ақ, ПБК мүшесі Гаухар Отыншина қатысып, оқушыларға жылы лебіздерін жеткізді.
Акция аясында аз қамтылған және көпбалалы отбасылардың балаларына мектепке қажетті құрал-жабдықтар салынған сөмкелер табыс етілді. Бұл – жаңа оқу жылына дайындық кезінде отбасыларға елеулі көмек болып отыр.
Айта кету керек, биылғы «Мектепке жол» акциясы аясында Қаражал-Жәйрем өңірінде 84 отбасыға, жалпы саны 145 балаға қолдау көрсетілді. Қайырымдылық шарасына қаланың түрлі мекемелері, кәсіпорындары мен шағын және орта бизнес өкілдері белсенді қатысып, әлеуметтік жауапкершілік үлгісін көрсетті.
Шара барысында оқушыларға арналған сөмкелерді табыстау рәсімі жылы шырайлы кездесуге ұласып, балалардың қуанышты күлкісі мен ата-аналардың алғысы ерекше әсер қалдырды.
«Мектепке жол» акциясы – тек материалдық қолдау ғана емес, сонымен қатар, қоғамның бірлігі мен мейірімділігінің көрінісі. Осындай игі бастамалар арқылы өскелең ұрпаққа қамқорлық пен жанашырлықтың маңызы түсіндірілуде.
Айта кетерлігі, бұл бастама мұнымен тоқтап қалмайды. «AMANAT» партиясының ұйымдастыруымен «Мектепке жол» акциясы алдағы уақытта да жалғасып, көмекке мұқтаж отбасыларға қолдау көрсетіле бермек.
Ізбасар ОЙБАС.