Ол бұрынғы Кеңестер Одағының жерін жүк көлігімен жүріп өтті, заманның өзгерісі мен технологияның күрт дамуын басынан өткерді, бірақ, не болса да өз ісіне адал болып қалды. Жас кезінен-ақ Изатулла Сағынтаев адам еңбегінің әрдайым құнды және қадірін арттыратынын білетін.
Биылғы жылы Металлург күніне орай Жәйрем кен байыту комбинаты көліктер цехының жүргізушісі көп жылғы мінсіз еңбегі үшін «Казцинктің» бас директорының Құрмет грамотасымен марапатталды. Оның өмір жолы кіп-кішкентай ауылдан бастау алған еді. Ата-анасы осы жердегі теміржол станциясында жұмыс істеген болатын. Жәйрем кен байыту комбинатының құрылысы басталған кезде отбасы Жәйремге көшіп келеді.
Көпбалалы отбасында 13 бала – мектептен кейін жоғарғы оқу орнында оқып, білім қууға мүмкіндік болмады: әке-шешесінің бір жағына шығысып, қолғабыс ету керек болды. 1979 жылы Изатулла 10 сыныпты аяқтасымен, бірден комбинатқа токарьдің көмекшісі болып жұмысқа кіреді.
1981 жылы әскерге кетеді. Оралғаннан кейін сыныптасы Разияға үйленеді, екеуі бірінші сыныптан бір партада отырған болатын. 1986 жылы Изатулла комбинатқа көлік цехына орналасады. Жеке фирмаларға жұмысқа шығып кеткен жылдары да болды, алайда 1996 жылы ол өзі үйренген туған кәсіпорнына қайта оралады.
Әуелі «УАЗикпен» Беларуссия, Башкирия, Москваға дейін барып, Қазақстанның түкпір-түкпіріне жүк тасыды. Кейіннен КамАЗға ауысты, содан бері үлкен жүк көлігін басқарғанына 22 жылдың жүзі болды. Бүгінгі таңда сенімді серігімен «Казцинктің» Алтай, Риддер, Өскемендегі кешендеріне жиі жол жүреді.
— Әрбір сапарым өзгеше, басқасына ұқсамайды, — деп әңгімелейді ол. — Жолда мен бір өзім әрі жүргізуші, әрі механик, жүкші және есепші де бола беремін. Бұл өте үлкен жауапкершілік, бір жағынан еркіндік те береді — жұмыс кестеңді өзің жоспарлайсың, және нәтижесі де өзіңе байланысты екенін білесің.
Изатулла Сағынтаевтың өзі атап өткендей, жұмыс істеген жылдар ішінде «Казцинкте» көптеген оң өзгерістер болды: техника заманға сай жаңарды және жұмысшыға барлық қолайлы жағдай жасалды. Ыңғайлы арнаулы киім, сапалы тағам, жаңа жабдықтар мен кабинадағы аспаптар қамтамасыз ететін жолдағы қауіпсіздік — осының бәрі қазір қалыпты жағдай.
Бірақ, басты қағида бұлжымастан қалды:
— Бізді асырап отырған көлігіміз, — дейді Изатулла Қосжанұлы. — Оны күтіп ұста, адал жұмыс істе — сонда еңбегіңнің жемісін көресің.
Ол көлік жүргізудің қыр-сырын толық меңгергендіктен де көлікті жаңадан тізгіндеген жас әріптестеріне үйретері мол білікті тәлімгер. Айтуынша, қазіргі жас балалар ауыр еңбекке дағдыланбаған, сондықтан да, оларды еңбекті бағалауға, жауапты болуға және өз ісіне құрметпен қарауға үйретеді.
Құрмет грамотасы кейіпкеріміз үшін күтпеген жерден болған тосынсый ғана емес, одан да жақсы жұмыс істеуге деген құлшынысын арттыратын түрткі болды.
— Жастарға бар білгенімді үйретемін. Бұл өмірлерінде кәдеге асады, — дейді сеніммен Изатулла Сағынтаев. – Мен өз өміріме дән ризамын, және де барлығында да солай болғанын қалаймын. Ол үшін еңбектену керек, ал еңбектің алмайтын асуы жоқ.
Жары Разия екеуі тату-тәтті, бірлікте 40 жыл қол ұстасып бірге келеді, үш баланы өсіріп-жеткізіп, төрт немеренің қызығына тоймай жүрген жайлары бар. Жер үйде тұрады, мереке сайын әулетімен бір дастархан басына жиналады.
Изатулла Сағынтаевтың жолы — бұл мыңдаған шақырым асфальт қана емес, өз мамандығы мен адамдарға деген адалдық, тынымсыз еңбек пен маңдай тер төгілген жылдар. Бақыттың кілті қарапайым деп санайды ол: өз ісіңді сүю, жақындарыңа қамқор болу және әр күніңді бағалау. Оның пайымдауынша, өмірді мәнді әрі құнды ететін дәл осы қағидалар.
Түйін сұрақтар
— Сіздің ұстанымыңыз?
— Кім жақсы еңбектенсе, сол жақсы нәтижеге қол жеткізеді.
— Сүйікті көлік түріңіз?
— Заманауи алпауыт жүк көліктері, олардың қуаттылығы мен ыңғайлылығына әрдайым сүйсінемін.
— Жолда шай немесе кофе?
— Әрине, шай!
— Сапарға өзіңізбен бірге міндетті түрде не аласыз?
— Ауыстыратын киім, құрал-саймандар, дәрі қобдишасы, тамақ, су, гигиеналық құралдар, құжаттар, қуаттағыш және де міндетті түрде отбасылық фотосурет.
— Арманыңыз қандай?
— Балаларымның бақытты болғанын көру.
— Өмірде ең маңызды нәрсе не деп ойлайсыз?
— Туған-туысың мен отбасың, сүйікті жұмысың мен еліміздің тыныштығы.
Алена ЕРМОЛАЕВА.
Фотолар И.Сағынтаевтың жеке мұрағатынан алынды