Қаражал қаласында биылғы жылы Ұлттық киім күні Наурызнама онкүндігі аясында ерекше мерекелік шара ретінде ұйымдастырылды. Бұл іс-шара қала тұрғындары мен қонақтары үшін ұлттық мәдениет пен дәстүрлерді дәріптеудің маңызды сәтіне айналды.
Мерекеге қатысу үшін қаладағы білім беру мекемелерінен бастап, мемлекеттік органдар мен кәсіпорындардың қызметкерлеріне дейін әртүрлі ұжымдар ұлттық нақыштағы киімдермен орталық алаңға жиналды. Шеру барысында әр мекеме өздерінің дәстүрлі киім үлгілерін таныстырып, қала тұрғындарына қазақ халқының әсем ою-өрнектерімен безендірілген ұлттық киімдерді көрсетті. Жиналғандар шеруде орталық алаң арқылы салтанатпен жүріп өтті.
Қала тұрғындары мен қонақтар шараны жылы қабылдап, белсенді түрде қатысты. Алаңға жиналғандар ұлттық киімде түскен фотосуреттерін жасап, оларды әлеуметтік желілерде бөлісті. Әсіресе, жастардың ұлттық киімге деген қызығушылығы ерекше байқалды: көптеген жас қатысушылар қазақтың дәстүрлі киімдерін киіп, мәдениетіне деген құрметін көрсетті.
Ұлттық киім күні тек сәндік шара ғана емес, сонымен қатар, жастарды өз мәдениетін бағалауға, ұлттық дәстүрлерді құрметтеуге тәрбиелеудің мәні бар іс-шара ретінде ұйымдастырылды. Шара барысында қазақ халқының бай мәдени мұрасы мен ұлттық киімдердің ерекшеліктері туралы әңгімелер айтылып, көрмелер мен таныстырулар өткізілді.
Қаражал қаласындағы бұл мереке қазақ халқының рухани байлығы мен мәдени дәстүрлерін насихаттауға, қаланың қоғамдық өмірін біріктіруге және халық арасындағы бірлікті нығайтуға арналған маңызды оқиғаға айналды.
Жазира СЕЙДҒАБИҚЫЗЫ