Қаражал қаласында ұлттық дәстүрімізді ұлықтайтын Көрісу күні – Амал мерекесіне орай салтанатты іс-шара өтті. Көрісу күні – береке мен бірліктің, сыйластық пен татулықтың символы. Мерекелік шара аясында қала тұрғындары бір-бірімен көрісіп, ақжарма тілектерін білдірді.
Бұл күні өңірдің өнерлі өрендері концерттік бағдарлама ұйымдастырып, өнерпаздар халыққа көтеріңкі көңіл-күй сыйлады. Сонымен қатар, «Бауырсақ-party» байқауы өткізіліп, қатысушылар бауырсақ пісіру шеберліктерін ортаға салды.
Ал, «Қайырымдылық күнінде» мейірімділік, татулық пен қамқорлық айқын көрініс тапты. Бұл күні Қаражал қаласының әкімі Айқын Елеусізов пен қала әкімінің орынбасары Диана Оспанбекова қайырымдылық шарасын ұйымдастырып, Ақтай шағын ауданының тұрғыны, өңірдегі ардақты аналардың бірі – Роза Жанабаеваға және ерекше назар мен қолдауды қажет ететін қаламыздың жас тұрғыны – Сергей Шаманскийдің үйіне барып, оларды Наурыз мерекесімен құттықтап, мерекелік сыйлықтар мен дәстүрлі Наурыз қоржынын табыстап, ізгі тілектер айтты.
– Наурыз – тек табиғаттың ғана емес, жанның да жаңару кезеңі. Бұл мереке мейірімділік пен қайырымдылықтың маңызын еске салып, адамзаттық құндылықтарды дәріптейді. Әр шаңыраққа молшылық пен береке тілейміз! – деді қала әкімі өз құттықтауында.