Ұлттық құндылықтарды насихаттау мақсатында биыл Наурыз мерекесі Мемлекет басшысы Қасым- Жомарт Тоқаевтың 2024 жылы мақұлдаған Наурызнама тұжырымдамасына сәйкес жаңартылған форматта – Наурызнама онкүндігі аясында өткізіледі. Осыған орай қалалық орталық кітапханада Наурыз мейрамына арналған бірнеше мерекелік іс-шаралар ұйымдастырылуда. Соның бірі – халықтың ыстық ықыласына бөленіп жүрген жерлесіміз, қаланың Құрметті азаматы, қаламгер Жарқынбай Жетімекпен кездесу өтті.
17 наурыз – Мәдениет және ұлттық салт-дәстүр күні. Бұл күн мәдениетті, өнерді және ұлттық құндылықтарды насихаттауға арналды. Осы күні кітапханалар мен кітап дүкендерінде, мәдениет үйлерінде «Автормен бірге кітап оқу» іс-шарасын ұйымдастырып, кітап оқу мәдениетін насихаттау қажет. Біздің кітапханамызда өрнегі мол жырларын, кітап оқу мәдениетін насихаттау, олардың өнегелі өмір жолдарын өскелең ұрпаққа өнеге тұтып, жастардың кітап оқуға құлшынысын арттыру, еліне, жеріне деген сүйіспеншіліктерін арттыру мақсатында «Ақын – елдің ардағы» атты тамаша жүздесу оқырмандардың көңілінен шықты.
Қазақта «Ел ағасыз болмас, тон жағасыз болмас» деген мақал бар. Шүкір, ел ағалары баршылық. Жарқынбай ағамыздан тәлім-тәрбие алу мақсатында ұйымдастырылып отырған сыр-сұхбат кешінде оқушыларымыз ағамыздың туындыларын 9 «а» сынып оқушылары Нұрасыл Ғабитұлы «Дастарханға бата» және Фархат Текебай «Бірінші наурыз», сонымен қатар, 10 «ә» сынып оқушысы Айым Ғаниқызы «Сарыарқа мәдениеті» өлеңдерін жатқа оқыды. Сырға толы әсерлі кеште жастар ақын өмірі мен шығармашылығымен, адами болмысымен, рухани әлемімен жақын таныса алды.
Жансая САДУАКАСОВА,
«Қаражал қаласының
орталықтандырылған
кітапханалар жүйесі» КММ библиографы.