Қазақтың ұлттық қолөнері – ғасырлар бойы қалыптасқан мәдени мұра, ата-бабамыздан қалған асыл қазына. Осы өнерді дәріптеп, оны жаңа заман талабына сай дамыту мақсатында Қаражал қаласының орталықтандырылған кітапханалар жүйесі жанынан «Алтын оймақ» үйірмесі құрылып, 2024 жылдан бастап өз жұмысын жандандырған болатын.
Бұл идеяның бастауында ұлттық өнерге жанашыр жан Тлеухор Байшөкенова тұр. Ол бұл ойды өткен жылдан бері жадында сақтап, тіпті, WhatsApp желісінде арнайы чат ашып, «Алтын оймақ» деген атауды белгілеп қойған екен. Төрт ай бойы жай ғана ой күйінде тұрған бұл идея бүгінде үлкен пайдасы бар, ұлттық өнерді дәріптейтін үйірмеге айналды. «Алтын оймақ» үйірмесінің мақсаты – халқымыздың дәстүрлі қолөнерін жаңғырту, оны қазіргі заманмен үйлестіре отырып дамыту. Үйірме мүшелері – он саусағынан өнер тамған, ұлттық өнерді жүрегімен сүйетін он әже. Айта кетсек, кітапхана қызметкері Жайнагүл Ұзақованың жетекшілігімен, Қаламқас Асанова, Қаламқас Сейтенова, Гүлбану Қожантаева, Бақыт Абдикаримова, Рыскүл Смағамбетова, Балдырған Қалмағамбетова, Бақытжан Садуова, Қайша Абсадирова және Айгүл Қайыржанова. Олар құрақ құрау, тігін тігу, киіз басу, тоқу сынды қолөнер түрлерін меңгеріп қана қоймай, кейінгі ұрпаққа үйретуді мақсат етеді.
Үйірме мүшелері өздерінің тіккен бұйымдарын түрлі көрмелерде ұсынып, ұлттық нақыштағы өнер туындыларымен көпшілікті тәнті етуде. 25 қазан – Республика күніне орай ұйымдастырылған «Кітап керуені» көрмесінде әжелердің қолөнер туындылары ерекше орын алды. Қазақтың ұлттық ою-өрнектерімен көмкерілген әсем бұйымдар жұртшылықтың зор ықыласына бөленді.
Сондай-ақ, үйірме мүшелері «Асыл әже» байқауына қатысып, өз өнерлерін паш етті. Бұл байқау Қаражал қаласының ішкі саясат, мәдениет, тілдерді дамыту және спорт бөлімі мен «Ұлытау жастары» қоғамдық бірлестігінің қолдауымен өтті. Мұндай іс-шаралар арқылы ұлттық өнердің қадірі артып, оның болашақ ұрпаққа аманат етілуіне жол ашылуда.
«Алтын оймақ» үйірмесі тек ұлттық өнерді жандандыру ғана емес, ұрпақтар сабақтастығын нығайту жолында да маңызды рөл атқарады. Әжелердің шеберлігі жастарға үлгі болып, жас буын ата-бабадан қалған асыл мұраны бойына сіңіруде.
Үйірменің болашақтағы мақсаттары қандай деген сұраққа Жайнагүл Ұзақова: -Жас қыз-келіншектерге қолөнерді үйрету, қолөнер бұйымдарының көрмесін кеңейтіп, қазақтың ұлттық киімдерін жаңғырту. Сондай-ақ, тұрмыстық бұйымдарды заман талабына сай әзірлеу, — деп жауап берді.
Ұлттық өнер – халқымыздың рухани байлығы. «Алтын оймақ» үйірмесі ата-бабадан қалған осы асыл қазынаны сақтап, дамытып, кейінгі ұрпаққа жеткізуді өзіне парыз санайды. Осындай игі бастамалар арқылы ұлттық мәдениетіміз жанданып, қазақтың қолөнері мәңгі жасай бермек.